لاہور (آن لائن) لاہور ہائیکورٹ نے خواجہ سعد رفیق کے پروڈکشن آرڈر جاری کرنے کے خلاف درخواست پر وفاقی حکومت ، سپیکر قومی اور الیکشن کمیشن آف پاکستان کو نوٹس جاری کرتے ہوئے دس جنوری کو جواب طلب کر لیا ۔ عدالت نے اس نوعیت کی تمام درخواستوں کو یکجا کر کے لگائے کا حکم دے دیا ۔ جسٹس مامون الرشید نے درخواست پر سماعت کی۔ درخواست مقامی وکیل اظہر صدیق ایڈووکیٹ کی جانب سے دائر کی گئی ہے ۔ درخواست میں موقف اختیار کیا گیا ہے کہ قومی اسمبلی
کا رول 108نیب اور ملکی قوانین سے متصادم ہے۔ زیر حراست ملزم کو دوران تفتیش اسمبلی اجلاس میں شرکت کی اجازت دینا قوانین کی سنگین خلاف ورزی ہے۔ موجودہ اجلاس میں بجٹ سیشن، یا اہم قانون سازی نہیں تھی۔ سعد رفیق نے نیب اور ملکی اداروں کو تنقید کا نشانہ بنایا۔ درخواست میں استدعا کی گئی ہے کہ عدالت قومی اسمبلی کا رول 108 کو کالعدم قرار دے۔عدالت سپیکر قومی اسمبلی کو ملزم اراکین اسمبلی کے پروڈکشن آرڈر جاری کرنے سے روکنے کا حکم دے۔
