لاہور(سی پی پی) پی آئی اے ملازمین کے لیے ڈیوٹی کے لئے وقت کی پابندی لازمی قرار دے دی گئی ہے۔تفصیلات کے مطابق پی آئی اے کے صدر و چیف ایگزیکٹیو آفیسر ائیر مارشل ارشد ملک نے علم میں یہ بات آنے پر کہ پی آئی اے کے ملازمین ڈیوٹی پر بہت تاخیر سے آتے ہیں یا آکر فوری غائب ہو جاتے ہیں پر تمام ملازمین اور افسران کو وقت پر آفس پہنچنے کی ہدایت کی اور حاضری کو یقینی بنانے کے لئے قومی ائیر لائن میں جنرل ڈیوٹی کرنے والے ملازمین کی حاضری ٹائم مینجمنٹ سسٹم(ٹی ایم ایس)

پر لگانے کا حکم دے دیا۔ہیڈ آفس میں ڈیوٹی اوقات صبح 9 بجے سے شام پانچ بجکر تیس منٹ کر دیئے گئے۔ پی آئی اے اسٹاف 3 دن تاخیر سے آئے گا تو ایک روز کی تنخواہ کاٹ لی جائے گی ، جس کا سرکلر جاری کردیا گیا۔ سرکلر کے مطابق قومی ائیرلائن میں وقت کی پابندی نہ کرنے والوں کو تین بار وارننگ کے بعد محکمانہ کارروائی کا سامنا کرنا ہوگا۔انتظامیہ کا کہنا ہے کہ تمام شعبہ جات کے سربراہ ملازمین کی 30 روزہ حاضری کی مکمل رپورٹ سی ای او کو پیش کریں گے۔

موضوعات:پی آئی اے