اسلام آباد (این این آئی)وفاقی وزیر اطلاعات چودھری فواد حسین نے کہا ہے کہ پاکستان میں ادائیگیوں کے توازن کا ابتدائی مسئلہ ختم ہوگیا ہے‘ آئی ایم ایف کیساتھ مستحکم لانگ ٹرم اقدامات کی طرف جارہے ہیں، شہباز شریف کو پبلک اکاؤنٹس کمیٹی کا سربراہ بنانا مذاق ہوگا‘ کسی کے خلاف کریک ڈاؤن نہیں کیا جارہا، توڑ پھوڑ ،پراپرٹی لوٹنے اور گاڑیوں کو نقصان پہنچانے والوں کو پکڑا جارہا ہے،بینکوں سے ڈیٹا چوری ہونے کے معاملے پر سب سے اچھا جواب پیپلز پارٹی اور

مسلم لیگ (ن) میں بیٹھے ماہرین دے سکتے ہیں۔بدھ کو پارلیمنٹ ہاؤس کے باہر صحافیوں سے گفتگو کرتے ہوئے وفاقی وزیر اطلاعات چودھری فواد حسین نے کہا کہ آئی ایم ایف کیساتھ مستحکم لانگ ٹرم اقدامات کی طرف جارہے ہیں، ملک میں اب استحکام ہے‘ پاکستان میں ادائیگیوں کے توازن کا ابتدائی مسئلہ ختم ہوگیا ہے۔ انہوں نے کہا کہ پبلک اکاؤنٹس کمیٹی کی تشکیل کیلئے اپوزیشن اپنی ضد چھوڑے، شہباز شریف کو پبلک اکاؤنٹس کمیٹی کا سربراہ کیسے بنایا جاسکتا ہے وہ نواز شریف کے دور حکومت کے آڈٹ اعتراضات کو تحفظ دے سکتے ہیں ان کو چیئرمین لگانا مذاق ہے اس حوالے سے جلد اپوزیشن کے ساتھ مل کر فیصلہ کیا جائیگا۔ انہوں نے کہا کہ آصف زرداری کو ہر بات غلط موقع پر یاد آتی ہے، زرداری صاحب کچھ بھی کر لیں مقبول نہیں ہوسکتے۔ انہوں نے کہا کہ بینکوں سے ڈیٹا چوری ہونے کے معاملے پر سب سے اچھا جواب پیپلز پارٹی اور مسلم لیگ (ن) میں بیٹھے ماہرین دے سکتے ہیں۔ انہوں نے بینکوں میں فراڈ کے حوالے سے کہا کہ سارے فراڈ کا تعلق موجودہ اپوزیشن کے دور اقتدار میں ہے، ان سے پوچھنا چاہیے یہ پیسوں کو ٹھکانے لگانے کیلئے خود بینکوں کو استعمال کر رہے تھے، اب ان کے معاملات سامنے آرہے ہیں۔ انہوں نے کہا کہ کسی کے خلاف کریک ڈاؤن نہیں کیا جارہا، توڑ پھوڑ ،پراپرٹی لوٹنے اور گاڑیوں کو نقصان پہنچانے والوں کو پکڑا جارہا ہے۔