پشاور(این این آئی)مولانا سمیع الحق کے صاحبزادے مولانا حامد الحق نے کہا ہے کہ اندازہ ہوگیا ہے کہ کونسی طاقتیں مولانا کے قتل کے پیچھے ہیں،واقعہ کی کڑیاں افغانستان سے ملتی ہیں۔مولانا سمیع الحق کے قاتلوں کو سرعام پھانسی دی جائے،مولانا حامد الحق نے جمعے کو ملک گیر احتجاج کا اعلان کردیا ۔ دارالعلوم حقانیہ اکوڑہ خٹک میں جمعیت علماء اسلام (س) کے مرکزی قائدین کے
ہمراہ پریس کانفرنس سے خطاب میں مولانا حامد الحق کا کہنا تھا کہ وقت نے ثابت کردیا کہ مولانا سمیع الحق کے قول و فعل میں تضاد نہیں،مولانا فضل الرحمان، مولانا عبدالغفور حیدری پر بھی قاتلانہ حملے ہوئے،دشمن اور نظام ہمیں کمزور نہ سمجھے،مولانا کے قتل کے ذمہ دار وہ لوگ ہیں جو پاکستان میں امن تباہ کرنا چاہتے ہیں،حامد الحق کا کہنا تھا کہ مولانا سمیع الحق کے قتل کی سازشوں کو بے نقاب کیا جائے اورقاتلوں کو کیفر کردار تک پہنچایا جائے،مولانا حامد الحق نے مطالبہ کیا کہ مولانا سمیع الحق کے خلاف سوشل میڈیا پر منفی پراپیگنڈہ بند کیا جائے،چاہتے تو عمران خان کی حکومت دو دن میں گرا سکتے تھے لیکن جمہوریت کی عزت کرتے ہیں۔ مولانا حامد الحق کا کہنا تھا کہ مولانا سمیع الحق واقعہ کی تحقیقات میں پیش رفت کا انتظار ہوگا،تحقیقات میں کوتاہی ہوئی تو مذہبی جماعتوں کی کل جماعتی کانفرنس میں اپنا فیصلہ واضح کرینگے،مولانا سمیع الحق کو سینے پر چھریاں ماری گئیں،پْشت پر کوئی نشان نہیں،جو قوتیں قاتلانہ حملے میں ملوث ہیں ہم ڈھونڈ نکالینگے،مولانا حامد الحق نے اعلان کرتے ہوئے کہا کہ مولانا سمیع الحق کے قتل کا بدلہ لینگے چاہے وہ افغانستان یا امریکہ میں ہو۔
