اسلام آباد (این این آئی)وفاقی دارالحکومت اسلام آباد میں آسٹریلیا سے تعلق رکھنے والا باشندہ مارک ایڈمز پر اسرار طور پر ہلاک ہوگیا۔ذرائع کے مطابق انٹرنیشنل آرگنائزیشن فار مائیگریشن کے سیکیوٹی افسر اور آسٹریلین شہری مارک ایڈمز کو ان کے گھر سے بے ہوشی کی حالت میں ہسپتال منتقل کیا گیا جہاں وہ زندگی کی بازی ہار گئے۔ذرائع کے مطابق آسٹریلین شہری مارک ایڈمز کی بے ہوشی کی خبر مدیحہ نامی ان کی اسسٹنٹ نے پولیس کو دی جن کی مدد سے انہیں ہسپتال منتقل کیا گیا ہے۔اسسٹنٹ مدیحہ کے مطابق دفتر میں اہم امور انجام دینے کے لیے جب افسر مارک ایڈمز دفتر نہیں
پہنچے تو انہیں اس کی تشویش ہوئی اور وہ وجہ معلوم کرنے کیلئے ان کے گھر پہنچی۔انہوں نے کہاکہ جب وہ اپنے منیجر کے گھر پہنچی تو وہ گھر کے کسی حصے میں نظر نہیں آئے تاہم باتھ روم کا دروازہ توڑنے پر معلوم ہوا کہ وہ یہاں بے ہوشی کی حالت میں موجود ہیں۔مدیحہ کے مطابق انہوں نے اس معاملے کی خبر پولیس کو دی، تاہم پولیس کے آنے کے بعد مارک ایڈمز کو ہسپتال منتقل کیا گیا جہاں وہ زندگی کی بازی ہار گیا۔پولیس ذرائع کے مطابق تھانہ کوہسار پولیس نے مارک ایڈمز کی لاش تحویل میں لے لی ہے جبکہ پوسٹ مارٹم کے بعد قانونی کارروائی کی جائے گی۔
