لاہور(آئی این پی) پاک چائنہ بس سروس کے تحت پہلی بس آج (سوموار)34 مسافروں کو لیکر لاہور سے چین کیلئے روانہ ہوگی‘لاہور سے بس 30 گھنٹوں میں چین کے شہر کاشغر جائیگی‘لاہور سے کاشغر تک یکطرفہ کرایہ 13ہزار روپے ہے ‘مسافروں کو ناشتہ ، کھانا، چائے وغیرہ مفت فراہم کی جائیگی۔ تفصیلات کے مطابق اس بس سروس کے دوران ہر مسافر اپنے ساتھ 20 کلو گرام تک سامان لے جانے کی اجازت ہوگی تاہم زائد وزن پر اضافی رقم دینا پڑیگی مذکورہ بس کمپنی کے چیف ایگز یکٹو محمد نوار نے بتایا کہ لاہور سے

چین جاتے ہوئے مسافروں کو اسلام آباد پہنچ کر ناشتہ کرایا جائے گامانسہرہ پہنچ کر چائے اور بشام میں دوپہر کا کھانا اور چلاس میں شام کی چائے اور گلگت پہنچ کر رات کا کھانا دیا جائیگااور رات 8 بجے سے صبح دو بجے تک مسافروں کو آرام کا وقت دیا جائیگا اور اسکے بعد درہ خنجراب کے راستے کاشغر پہنچا جائیگاپاک چائنہ بس اسی راستے سے لاہور واپس آئیگی لاہور سے ہفتے میں چار روز ہفتہ، اتوار، پیر اور منگل کو بس کاشغر کیلئے روانہ ہوگی جبکہ کاشغر سے لاہور کیلئے بس منگل، بدھ، جمعرات اور جمعہ کے روز روانہ ہوگی۔