اسلام آباد(این این آئی)ایف آئی اے نے ملک بھر کی ہاؤسنگ سوسائٹیز کا فرانزک آڈٹ مکمل کرلیا ہے۔ نجی ٹی وی کے مطابق رپورٹ میں ہاؤسنگ سوسائٹیز میں بڑے پیمانے پر گھپلوں کا انکشاف ہوا ہے۔ 631 کوآپریٹو ہاؤسنگ سوسائٹیز میں سے 452 کا فرانزک آڈٹ کیا گیا جس سے پتہ چلا کہ صرف 51 سوسائٹیز قانون کے مطابق بنائی گئی ہیں۔ ملک کی 3186 نجی ہاؤسنگ اسکیموں میں سے 2814 کا آڈٹ بھی کیا گیا تو پتہ چلا کہ صرف 248 قانون کے مطابق ہیں۔رپورٹ کے مطابق ملک بھر میں 5967 ایسی ہاؤسنگ اسکیمیں بھی ہیں جن کی کوئی رجسٹریشن ہی

نہیں۔ کوآپریٹو سوسائٹیوں کے لیےمتنازعہ اراضی کو خریدا گیا جبکہ ہاؤسنگ سوسائٹیز کیلئے ٹکروں میں منتشر زمین خریدی گئی۔نجی ہاؤسنگ میں عام لوگوں کیساتھ فراڈ ہوا اور درخواست گزاروں کو پیسے لیکر پلاٹ نہ ملے اور حد سے زیادہ پلاٹ فائل فروخت کرکے بڑی رقم خرد برد کی گئی۔ ہاؤسنگ سوسائٹیز کی جانب سے قبضہ گروپوں کو پیسے دیے گئے جب کہ پلاٹس تبادلوں کی مد میں وصول فیس کبھی کوآپریٹو ڈیپارٹمنٹ کو ادا نہیں کی گئی۔ پیسے کی گردش کے لیے غیر مصدقہ اکاؤنٹ کھولے گئے جب کہ رجسٹرار آفس اور آڈیٹر سے یہ اکاونٹس چھپائے گئے۔