اسلام آباد (این این آئی)وزیر مملکت برائے مواصلات مراد سعید نے کہا ہے کہ سنا چوروں کی اے پی سی ہونے جارہی ہے جس کی صدارت سب سے بڑا چور کریگا ٗوزیراعظم عمران خان قومی اداروں کو سیاسی اثر و رسوخ سے آزاد کرائیں گے‘ مولانا فضل الرحمان نے کشمیر کمیٹی میں بیٹھ کر مزے اٹھائے اب ان کو حساب دینا ہوگا۔ منگل کو پارلیمنٹ ہاؤس کے باہر میڈیا سے گفتگو کرتے ہوئے انہوں نے کہا کہ کے پی کے میں
پی ٹی آئی کی حکومت بنی تو اداروں کو مکمل طور پر سیاسی اثر و رسوخ سے آزاد کردیا‘ اسی طرح وزیراعظم عمران خان قومی اداروں کو بھی سیاسی اثر و رسوخ سے آزاد کرائیں گے‘ اداروں میں اصلاحات کے حوالے سے کام جاری ہے۔ وزیر مملکت نے کہا کہ پنجاب اور وفاق میں شریف برادران نے اداروں کو تباہ کردیا۔ انہوں نے کہاکہ کل دو بڑے لیڈروں کے ایک دوسرے کو گھسیٹنے کے منظر کو پوری قوم نے دیکھا ہے ۔ مراد سعید نے کہا کہ وزیراعظم نے کہا تھا کہ جب احتساب کا عمل شروع ہوگا تو چور ڈاکو کہیں گے اداروں کو اور جمہوریت کو خطرہ ہے لیکن اپوزیشن بے شک واویلا کرے چوروں کے خلاف احتساب کا عمل جاری رہے گا۔ ماضی میں تحریک انصاف نے اپوزیشن میں رہ کر بہترین اپوزیشن کا کردار ادا کیا۔ وزیر مملکت نے کہا کہ جب احتساب کا عمل شروع ہوا اس کے بعد فالودہ والے کے اکاؤنٹ سے اربوں روپے نکل رہے ہیں۔ مولانا فضل الرحمان نے کشمیر کمیٹی میں بیٹھ کر مزے اٹھائے اب ان کو حساب دینا ہوگا۔ ایک سوال کے جواب میں وزیر مملکت نے کہا کہ سنا ہے چوروں کی مجلس ہو رہی ہے اس کی سربراہی سب سے بڑا چور کرے گا۔ پاکستان سے باہر منتقل ہونے والی قومی دولت کے لئے حکومت نے ٹاسک فورس بنائی ہے جو ان ممالک کے ساتھ معاہدے کر رہی ہے قومی دولت کو واپس لانے کیلئے۔
