اسلام آباد(آن لائن)اسلام آباد ہائی کورٹ کے ججز سے متعلق سوشل میڈیا پر’جھوٹ اور ہتک آمیز مواد‘ کی تشہیرکے خلاف وفاقی تحقیقاتی ادارے (ایف آئی اے) میں سائبر کرائم کا مقدمہ درج کرلیا گیا۔ذرائع کے مطابق اسلام آباد ہائی کورٹ کے ان ججز کے خلاف سوشل میڈیا پر ’ہتک آمیز مواد‘ کی تشہیر کا انکشاف ہواجو ہائی پروفائل مقدمات کی سماعت کررہے ہیں۔
قائم مقام رجسٹرار نے مقدمہ ایف آئی آر میں رجسٹرڈ کرادیا۔ایف آئی آر کے مطابق ایف آئی اے کو ہدایت جاری کی گئی کہ ’معاملے کی تحقیقات کرکے فوری طور پر رپورٹ جمع کرائی جائے‘۔اسلام آباد ہائی کورٹ کی جانب سے سابق وزیراعظم نواز شریف، ان کی صاحبزادی مریم نواز اور داماد ریٹائرڈ کیپٹن محمد صفدر کو ایون فیلڈ ریفرنس میں سزائیں اپیلوں پر فیصلہ آنے تک معطل کی تھیں۔ججز کے خلاف سوشل میڈیا پر ہتک آمیز مواد کی تشہیر کا سلسلہ اسی تناظر میں دیکھا گیا ۔ایف آئی اے نے نامعلوم افراد کے خلاف الیکرونک کرائم ایکٹ 2016کے سیکشن 10 اے ، 11، 20 سمیت پی پی سی 109 اور 506 کے تحت مقدمہ درج کرلیا۔اس حوالے سے ذرائع نے بتایا کہ انکوائری کے دوران تکنیکی ماہرین نے ایف آئی اے سائبرکرائم رپورٹنگ سینٹر سے تمام مواد طلب کرلیا جس میں یوٹیوب کی 3 ویڈیوز اور ایک فیس بک اکاؤنٹ کی نشاندہی کی گئی ۔نتائج کی روشنی میں جوڈیشل مجسٹریٹ کے عدالتی حکم نامہ فیس بک انتظامیہ کو کو ارسال کردیا تاکہ مذکورہ یوٹیوب چینل کے سبسکرائبر کے اکاؤنٹ کی معلومات فراہم کی جائیں۔تاہم اس سلسلے میں یوٹیوب انتظامیہ کو بھی حکم نامہ ارسال کیا جا چکا ہے اور ان کی جانب سے جواب کا انتظار ہے۔علاوہ ازیں مذکورہ معاملے پر پی ٹی اے نے نظر ثانی شروع کردی اور مبینہ سوشل میڈیا اکاؤنٹ کے فوکل پرسن سے شکایت کی ہے اور مبینہ شخص کی ابتدائی معلومات طلب کی ہیں۔
