لاہور(سی پی پی) پاکستان عوامی تحریک کے سربراہ ڈاکٹر طاہرالقادری نے سانحہ ماڈل ٹاؤن بارے لاہورہائیکورٹ کے فیصلے کو عدالت عظمیٰ میں چیلنج کرنے کا اعلان کرتے ہوئے کہا ہے کہ سانحہ ماڈل ٹاؤن کے منصوبہ ساز طلب نہیں ہوں گے تو انصاف کیسے ہوگا۔میڈیا سے گفتگو کرتے ہوئے ڈاکٹر طاہرالقادری نے لاہور ہائیکورٹ کے فل بینچ کے فیصلے کو سپریم کورٹ میں چیلنج کرنے کا اعلان کیا اور کہا کہ ملازم طلب کیے گئے مالکان نہیں۔لاہور ہائیکورٹ کی جانب سے سانحہ ماڈل ٹاؤن کیس میں شریف برادران

سمیت 12 شخصیات کی طلبی کی منہاج القرآن کی درخواست مسترد کیے جانے کے عدالتی فیصلے پر سوال اٹھاتے ہوئے ڈاکٹر طاہر القادری نے کہا کہ کیا 17 جون 2014 کے دن انسان نہیں چیونٹیوں کو مارا گیا تھا اور پولیس کی دہشتگردی میڈیا کے ذریعے پوری دنیا نے دیکھی تھی۔ڈاکٹر طاہر القادری کا کہنا تھا کہ سانحہ ماڈل ٹاؤن کے منصوبہ ساز طلب نہیں ہوں گے تو انصاف کے تقاضے کس طرح پورے ہوں گے۔انہوں نے کہا ہم سانحہ ماڈل ٹاؤن کے مظلوموں کو انصاف دلانے تک سکون سے نہیں بیٹھیں گے ۔