اسلام آباد (سی پی پی ) پہلی مرتبہ پاک فوج کے جوان روس میں فوجی تربیت حاصل کریں گے، پاکستان روس مشترکہ فوجی مشاورتی کمیٹی کے اجلاس کے اختتام پر معاہدہ طے پاگیا۔ تفصیلات کے مطابق روس کے نائب وزیر دفاع الیگزینڈرفومین ان دنوں پاکستان کے دورے کے سلسلے میں اسلام آباد میں موجود ہیں۔ روسی نائب وزیردفاع الیگزینڈرفومین کی پاکستان آمد کے بعد وزارت دفاع میں پہلا پاک روس مشترکہ فوجی مشاورتی کمیٹی کا اجلاس ہوا۔
اجلاس میں افغانستان اور مشرق وسطٰی کی صورتحال پرتبادلہ خیال کیا گیا۔ اجلاس میں دوطرفہ دفاعی تعاون پرتفصیلی گفتگو بھی کی گئی۔ اجلاس میں پاکستانی وفدکی قیادت سیکریٹری دفاع لیفٹیننٹ جنرل (ر) ضمیرالحسن شاہ نیکی، جبکہ روسی وفد کی قیادت نائب وزیر دفاع الیگزینڈر فومین نے کی۔ اجلاس کے بعد دونوں ممالک کے درمیان ایک تاریخی معاہدہ طے پاگیا۔ اجلاس کے بعد روسی اداروں میں پاکستان کو تربیتی سہولیات کیلئے معاہدے پردستخط کیے گئے۔
