اسلام آباد (این این آئی) پاکستان پیپلز پارٹی کے سینئر رہنماء اعتزاز احسن نے کہا ہے کہ شہباز شریف اورلیگی قیادت نے نوازشریف اور مریم نواز کو دھوکہ دیا ہے ۔ایک بیان میں پیپلز پارٹی کے سینئر رہنماء اعتزاز احسن نے لیگی رہنماؤں کو تنقید کا نشانہ بناتے ہوئے کہاکہ کس طرح شاہدخاقان عباسی، شہبازشریف، سعدرفیق ایئرپورٹ پہنچ ہی نہیں سکے؟خواجہ آصف، ایاز صادق،رانا ثناء اللہ، خرم دستگیر نے بھی نوازشریف کوتن تنہا چھوڑا جبکہ خواجہ سعدرفیق لوہے کے چنے چبانے والا بھی نظر نہیں آیا۔
انہوں نے کہا کہ شہبازشریف کو چاہئے تھا ایئرپورٹ ناکے تک ضرور پہنچتے، ان رہنماؤں کو اندر جانے سے کوئی نہیں روکتا۔اعتزاز احسن نے کہا کہ نواز شریف اور مریم کیخلاف سوچی سمجھی سازش ہوئی ہے، (ن) لیگی لیڈروں نے سازش کے تحت اپنے آپ کو غائب رکھا۔انہوں نے مشاہد اللہ خان کو لاہور ایئر پورٹ پر پہنچنے پر داد دی۔انہوں نے کہا کہ لیگی رہنماؤں نے نواز شریف کو بلاکر منظر سے ہٹا دیا ہے، پھنسا دیا ہے،اتنادھوکہ اپنی سیاسی تاریخ میں کبھی نہیں دیکھاجونوازشریف یامریم کیساتھ دیکھا ہے ۔
