اوکاڑہ (مانیٹرنگ ڈیسک) لڑکیوں سے اجتماعی زیادتی اور ویڈیوز کا ایک اور سکینڈل منظر عام پر آ گیا ہے۔ ایک نجی ٹی وی چینل کی رپورٹ کے مطابق یہ سکینڈل نجی ٹی وی چینل کی پروگرام اندھیر نگری کی ٹیم نے بے نقاب کیا، بچھو نامی گینگ پچھلے کئی سالوں سے لڑکیوں کی نازیبا ویڈیوز بنا کر بلیک میل کرتا رہا ہے۔
رپورٹ میں بتایا گیا کہ بچھو نامی گینگ پچھلے کئی سالوں سے لڑکیوں کی نازیبا ویڈیوز بنا کر انہیں بلیک میل کر رہا تھا، یہ گینگ غریب لڑکیوں کو ڈرا دھمکا کر اور ان کی ویڈیو بنا کر کئی سالوں سے بلیک میل کر رہا تھا، رپورٹ میں کہا گیا کہ آج سے دو دن قبل اوکاڑہ میں ایک تیرہ سالہ معذور لڑکی سے زیادتی کی گئی اور اس کی ویڈیو بھی بنائی گئی، رپورٹ میں بتایا گیا کہ ہماری ٹیم معذور بچی سے زیادتی کے بعد سے اب تک فرید کوٹ اوکاڑہ میں موجود ہے، جب یہاں گاؤں والوں سے اس بارے میں بات کی تو انہوں نے بتایا کہ یہ لوگ بہت بااثر ہیں اس سے پہلے بھی بہت سے متاثرین ہیں لیکن ان کے ڈر کی وجہ سے کوئی ان کے خلاف بولا ہی نہیں۔ گاؤں کے لوگوں نے بتایا کہ اب تک یہ لوگ گاؤں کی پچاس لڑکیوں کو نشانہ بنا چکے ہیں۔ پولیس نے ان لوگوں کو گرفتار کر لیا ہے اور ان سے تحقیقات کا سلسلہ جاری ہے۔ اس حوالے سے بھی تفتیش جاری ہے کہ یہ لوگ ویڈیوز بنا کر بیرون ملک تو نہیں بھیجتے تھے۔ گاؤں والوں نے نجی ٹی وی چینل کی ٹیم کو بتایا کہ ایک لڑکی نے خود کشی کر لی ہے اور ایک ایسی لڑکی بھی موجود ہے جس کو آٹھ سات ماہ کا بچہ ہے۔ گاؤں کی ایک خاتون نے بتایا کہ ایک لڑکی نے چھ ماہ پہلے خود کشی کی اور ایک اور لڑکی نے تنگ آ کر دو ماہ پہلے خود کشی کر لی تھی۔ ان لڑکیوں کے ساتھ پتہ نہیں کیا کیا گیا کہ انہوں نے خاموشی سے اپنی جان دے دی۔
