کوٹ مومن (مانیٹرنگ ڈیسک) کوٹ مومن کے حلقہ پی پی تیس میں ضمنی انتخاب کے لیے پولنگ کا وقت ختم ہونے کے بعد ووٹوں کی گنتی کا عمل جاری ہے، ایک نجی ٹی وی چینل کی رپورٹ کے مطابق کوٹ مومن کے حلقہ پی پی 30 کے ضمنی انتخاب میں پاکستان مسلم لیگ (ن)
کے حمایت یافتہ یاسر ظفر سندھو اور پاکستان تحریک انصاف کے راؤ ساجد محمود کے درمیان سخت مقابلہ ہے۔ن لیگ کے رکن قومی اسمبلی چودھری طاہر احمد سندھو جو 2013ء میں پی پی 30 سے منتخب ہوئے تھے ان کی وفات کے بعد یہ نشست خالی ہو گئی تھی، اس ضمنی انتخاب میں چار امیدوار مدمقابل تھے جن میں تحریک انصاف کے راؤ ساجد محمود، ن لیگ کے حمایت یافتہ امیدوار یاسر ظفر سندھو جبکہ راؤ وقاص احمد اور عاصم اقبال نے آزاد امیدوار کی حیثیت سے ضمنی انتخاب میں شریک ہوئے۔ پی پی 30 کے ضمنی الیکشن کے غیر حتمی و غیر سرکاری نتائج کے مطابق 19 پولنگ سٹیشنز میں ن لیگ کے حمایت یافتہ امیدوار یاسر ظفر سندھو 4124 ووٹوں کے ساتھ آگے ہیں جبکہ 2814 ووٹوں کے ساتھ تحریک انصاف کے راؤ ساجد محمود دوسرے نمبر پر ہیں۔ واضح رہے کہ حلقہ پی پی 30 میں کل ووٹرز کی تعداد 1 لاکھ 73 ہزار 919 ہے اس میں مرد ووٹرز کی تعداد 98 ہزار 145 جبکہ خواتین ووٹرز کی تعداد 75 ہزار 774 ہے۔ حلقے میں کل پولنگ سٹیشنز 137 ہیں جن میں مرد پولنگ سٹیشنز کی تعداد 31 جبکہ خواتین پولنگ سٹیشنز کی تعداد بھی 31 ہے۔
