لاہور (آئی این پی ) وزیر اعلیٰ پنجاب محمد شہباز شریف نے کہا ہے کہ پاکستان کے عوام جھوٹ اور الزام تراشی کی سیاست سے نفرت کرتے ہیں، ترقی کے سفر میں رخنہ ڈالنے والوں نے عوام سے کھلی دشمنی کی ہے،عوام 2018 کے عام انتخابات میں جھوٹ کے علمبرداروں کو مسترد کردیں گے۔لاہورسے جاری بیان میں وزیراعلی پنجاب نے کہاکہ 22 کروڑ عوام ترقی اور خوشحالی چاہتے ہیں۔
ان کے دور کے ترقیاتی منصوبے معیار اور شفافیت کے اعتبار سے اپنی مثال آپ ہیں۔شہباز شریف نے کہا کہ ترقیاتی منصوبوں میں اربوں روپے کی بچت کرکے پاکستان میں پہلی بار نئی تاریخ رقم کی گئی ہے۔انہوں نے کہا کہ پنجاب کے طول و عرض میں آج ترقیاتی منصوبوں کا جال بچھا دیا گیا ہے اورہر منصوبے اور پروگرام میں جنوبی پنجاب کے عوام کو فوقیت دی گئی ہے۔
