اسلام آباد(مانیٹرنگ ڈیسک)قصور کی ننھی زینب اور دیگر 7بچیوں کے قاتل عمران نے ایک اور معصوم بچی کو قتل کرنے کا اعتراف کر لیا، قومی اخبار کی رپورٹ میں دعویٰ۔ تفصیلات کےمطابق پاکستان کے موقر قومی اخبار کی رپورٹ میں تحقیقاتی ٹیم کے ایک ذمہ دار آفیسر کے حوالے سے دعویٰ کیا گیا ہے کہ قصور کی ننھی زینب اور دیگر 7بچیوں کے سیریل کلر عمران نے ایک اوربچی ثنا کے قتل کا بھی اعتراف کر لیا ہے۔ عمران نے تفتیش کے دوران بتایا کہ سات سالہ بچی ثنا کو اس نے سٹیل باغ کے علاقہ میں ایک زیر تعمیر
مکان کے اندر زیادتی کا نشانہ بنایا اور 7مئی 2016کو اسے قتل کر دیا۔ ملزم کے اس سنسنی خیز انکشاف کی رپورٹ وزیراعلیٰ پنجاب کو ارسال کر دی گئی ہے جبکہ عدالت نے ملزم کو مزید دو روزہ جسمانی ریمانڈ پر پولیس کے حوالے کر دیا ہے۔ دریں اثنا قصور میں ایک بڑے تعلیمی ادارے کو ننھی زینب کے نام سے منسوب کر دیا گیا ہے۔