اسلام آباد(مانیٹرنگ ڈیسک)ڈاکٹر شاہد مسعود کی جانب سے ڈھائی کروڑ لے کر ان کے خلاف پروپیگنڈہ کرنے کا الزام ، اینکر منصور علی خان نے اپنے اثاثے ظاہر کر دئیے، کرائے کے گھر میں رہتا ہوں، ایک گاڑی اثاثہ ہے، اگر کوئی میرا غیر قانونی یا چھپایا ہوا اثاثہ نکال کر دکھا دے تو صحافت کیا پاکستان ہی چھوڑدوں گا، منصور علی خان نےاوپن چیلنج دیدیا۔ تفصیلات کے مطابق ڈاکٹر شاہد مسعود

کی جانب سے زینب کے قاتل عمران کے بینک اکائونٹس سے متعلق دعوئوں کی تحقیقات کرنے والے صحافی اور اینکرز کی جانب سے ان کے دعوئوں کو جھوٹا قرار دئیے جانے کے بعد ڈاکٹر شاہد مسعود نے ایک پروگرام میں اپنے خلاف ڈھائی ارب روپے کی مدد سے مہم میڈیا پر لانچ کئے جانے کا دعویٰ کرتے ہوئے کہا تھا کہ ایک اینکر کو ان کے خلاف بولنے کیلئے ڈھائی کروڑ روپے دئیے گئے ہیں۔جس پر نجی ٹی وی اینکر منصور علی خان نے اپنے اثاثے ظاہر کرتے ہوئے کہا ہے کہ د و ہفتے پہلے میں نے بینک سے آٹھ لاکھ روپے گھر کی مرمت کیلئے لئے تھے ، مجھے دس سال صحافت کے شعبے میں ہو گئے ہیں میری پاس ابھی تک اپنا گھر نہیں جبکہ اثاثوں میں صرف میرے پاس ایک گاڑی ہے اور یہی مالی حالت ہے ۔ منصور علی خان نے اوپن چیلنج کرتے ہوئے کہا کہ کوئی مائی کا لال ہے تو میرا کوئی غیر قانونی یا چھپایا ہوا اثاثہ نکال کر دکھا دے تو میں صحافت کیا پاکستان چھوڑ دوں گا۔واضح رہے کہ منصور علی خان دوسرے اینکر تھے جنہوں نے ڈاکٹر شاہد مسعود کے انکشافات کےبعد ان کا انٹرویو کیا تھا اور تحقیقات کے بعد حقائق منظر عام پر لائے تھے۔ جس پر ڈاکٹر شاہد مسعود نے ان پر رقم لے کر ان کے خلاف مہم چلانے کا الزام عائد کرتے ہوئے ثبوت سامنے لانے کا اعلان کیا تھا۔

موضوعات:ڈاکٹر شاہد مسعود منصور علی خان