لاہور ( این این آئی) وزیراعلی پنجاب محمد شہباز شریف نے بچوں کے تحفظ کے لیے وزیر قانون رانا ثنااللہ کی سربراہی میں کمیٹی قائم کردی۔وزیراعلی کی جانب سے تشکیل دی گئی 20 رکنی کمیٹی کا نوٹیفکیشن بھی جاری کردیا ہے جس میں وزیر تعلیم رانا مشہود احمد ، سپیشل سیکرٹری ہوم ، چیئرپرسن چائلڈ پروٹیکشن ، ایڈیشنل چیف سیکرٹری ہوم ، آئی جی پنجاب ، سیکرٹری سکولز ، سیکرٹری انفارمیشن، سیکرٹری پراسیکیوشن ، سیکرٹری انسانی

حقوق ، چیئرمین متروکہ وقف املاک بورڈ ، سی او او پنجاب سیف سٹی اتھارٹی سمیت دیگر شامل ہیں۔نوٹیفکیشن کے مطابق کمیٹی بچوں کے تحفظ کے لیے سفارشات تیار کرے گی اور کمیٹی کا اجلاس روزانہ کی بنیاد پر ہوگا۔نوٹیفکیشن میں کہا گیا ہے کہ کمیٹی پولیس کے کام کا جائزہ اور آگہی مہم کے لیے سفارشات بھی مرتب کرے گی جب کہ بچوں کے تحفظ کو نصاب کا حصہ بنایا جائے گا۔جبکہ کمیٹی اساتذہ اور علما کرام سے بھی مشاورت کرے گی۔