اسلام آباد(مانیٹرنگ ڈیسک)پنجاب حکومت کا عوامی تحریک کے احتجاج کے اعلان کے بعد کسی دبائو میں نہ آنے کا فیصلہ، شہباز شریف کی زیر صدارت امن و امان سے متعلق اہم اجلاس، حکمت عملی بنا لی گئی، پر امن احتجاج نہ روکنے کا فیصلہ ، سکیورٹی فراہم کی جائے گی،
احتجاج پر تشدد ہونے پر قانون کو حرکت میں لانے کا فیصلہ۔ تفصیلات کے مطابق پنجاب حکومت نے عوامی تحریک کے احتجاج کے اعلان پر کسی دبائو میں نہ آنے کا فیصلہ کیا ہے۔ پاکستان عوامی تحریک کے سربراہ ڈاکٹر طاہر القادری نے گزشتہ روز حکومت کے خلاف 17جنوری سے ملک گیر احتجاجی تحریک کا اعلان کر دیا ہے۔ ذرائع کے مطابق وزیراعلیٰ پنجاب شہباز شریف کی زیر صدارت امن و امان سے متعلق اہم اجلاس ہوا جس میں پاکستان عوامی تحریک کی جانب سے احتجاج کے اعلان پر حکمت عملی بنا لی گئی۔ ذرائع نے بتایا کہ پنجاب حکومت نے کسی بھی دبائو میں نہ آنے کا فیصلہ کیا ہے جب کہ پر امن احتجاج کو نہ روکنے اور احتجاج کرنے والوں کو سکیورٹی بھی فراہم کرنے کا فیصلہ کیا گیا ہے۔ ذرائع کے مطابق اجلاس میں فیصلہ کیا گیا کہ احتجاج جمہوری حق ہے، کوئی احتجاج کرنا چاہتا ہے تو شوق سے کرے، پر امن احتجاج کو نہیں روکا جائے گا، اگر سرکاری املاک کو نقصان پہنچانے کی کوشش کی گئی تو قانون حرکت میں آئے گا۔ واضح رہے کہ پاکستان عوامی تحریک نے گزشتہ دنوں آل پارٹیز کانفرنس کا انعقاد کیا تھا جس میں وزیراعلیٰ پنجاب شہباز شریف اور وزیر قانون رانا ثنا اللہ سے 7جنوری تک مستعفی ہونے کا مطالبہ کیا گیا تھا۔
