اسلام آباد(اے این این)پاکستان پیپلز پارٹی کے رہنما ڈاکٹر عاصم کا نام ایگزٹ کنٹرول لسٹ سے نکال دیا گیا۔وزارت داخلہ نے سپریم کورٹ کے احکامات کی روشنی میں ڈاکٹر عاصم کا نام ای سی ایل سے نکال دیا ہے۔پیپلزپارٹی ذرائع کا کہنا ہے کہ ڈاکٹر عاصم اس وقت دبئی میں مقیم ہیں اور بہت جلد پاکستان واپس آ جائیں گے۔ وزارت داخلہ نے اس حوالے سے باقاعدہ نوٹیفکیشن بھی جاری کر دیا ہے۔

یاد رہے کہ سپریم کورٹ نے وزارت داخلہ کو پہلے 28 اگست 2017 اور پھر 29 نومبر 2017 کو ڈاکٹر عاصم کا نام ای سی ایل سے نکالنے کا حکم دیا تھا۔ڈاکٹر عاصم کو اربوں روپے کی کرپشن کے الزام میں مقدمات کا سامنا ہے اور گزشتہ ماہ عدالت سے اجازت ملنے کے بعد ڈاکٹر عاصم علاج کی غرض سے لندن روانہ ہو گئے تھے۔واضح رہے کہ اس سے قبل سابق صدر پرویز مشرف اورماڈل ایان علی کا نام بھی ای سی ایل سے نکالا گیا تھا جس کے بعد سے وہ آج تک وطن واپس نہیں آئے۔

موضوعات:سپریم کورٹ، وزارت داخلہ، ڈاکٹر عاصم