اسلام آباد(این این آئی)آل پاکستان مسلم لیگ کے سیکرٹری جنرل ڈاکٹر محمد امجد نے کہا ہے کہ بلاول سید پرویز مشرف کو اپنی ماں کا قاتل کہنے کی بجائے چند بنیادی سوالات کے جوابات ڈھونڈے،قاتل اسے اپنے ہی گھرمیں زرداری کی صورت میں مل جائے گا۔بے نظیرقتل کا فائدہ زرداری کو ہوا، زرداری نے تحقیق میں مددگارتمام ثبوت ختم کروادئیے اور اپنے انٹرویو میں کہا کہ قاتل بیت اللہ محسود ہے۔
قمرزمان قائرہ نے بھی کہا کہ قتل کی منصوبہ بندی سمیع الحق کے مدرسے میں کی گئی۔بے نظیر بھٹو کی برسی کے موقع پراپنے خطاب میں بلاول بھٹو زرداری کی طرف سے سابق صدر پاکستان اور آل پاکستان مسلم لیگ کے چیئرمین سید پرویز مشرف کو بے نظیر کا قاتل قراردینے پر اپنے ردعمل میں کہا کہ بلاول اپنے باپ کی مکاری کا شکار ہوچکا ہے۔وہ اپنے باپ کے خوف سے اس کا موقف اختیار کرنے پر مجبور ہے ۔بلاول اگر چند آسان سوالوں کے جوابات ڈھونڈلے تو اسے زرداری کی صورت میں قاتل اپنے گھر میں ملے گا۔ انہوں نے کہا کہ بے نظیر قتل کا فائدہ آصف زرداری کوہوا۔زرداری نے جعلی وصیت دکھا کر پیپلز پارٹی پرقبضہ کیا۔بے نظیر کی جائیداد،انشورنس اور بنک بیلنس حاصل کیا اور پھر صدر پاکستان بن گیا۔ان کا کہنا تھا کہ جس دن ان نکات پر کہ ناہیدخان اور صفدر عباسی جو موقع کے گواہ تھے،ان کے بیانات کیوں نہیں لئے گئے،خالد شہنشاہ کو کس نے قتل کروایا،بے نظیر کے زیراستعمال بلیک بیری بلاول ہاؤس میں کس نے چھپایا، بم پروف گاڑی کی چھٹ کیوں کٹوائی گئی، بے نظیر کو گاڑی کی چھت سے سرباہر نکالنے کو کس نے کہا،جلسہ گاہ سے واپسی پر بے نظیر کا روٹ کس نے تبدیل کروایا،بے نظیر کے سیکیورٹی انچارج رحمان ملک جلسہ گاہ سے واپس کیوں چلے گئے تھے، بے نظیر کا پوسٹ مارٹم کرنے سے ڈاکٹروں کو کس نے منع کیا،
آصف زرداری نے اپنے انٹرویو میں قاتل بیت اللہ محسود کو کیوں کہا،قمرزمان قائرہ نے کیوں کہا کہ بے نظیرقتل کی منصوبہ بندی سمیع الحق کے مدرسے میں ہوئی اور سب سے بڑی بات کہ بے نظیر کے قتل کے نتیجے میں ملنے والے پانچ سالہ دوراقتدار میں آصف زرداری نے قاتل کیوں نہیں پکڑے، شفاف تحقیقات کی گئیں تو قاتل آصف زرداری کی شکل میں سامنے آئے گا۔ آصف زرداری نے بہت سے مفادات حاصل کرنے کے لئے بے نظیربھٹو کو قتل کروایا اور اب بچنے کے لئے سید پرویز مشرف کوالزام دیا جارہا ہے۔ انہوں نے کہا کہ بلاول کو اپنی ماں کے خون پرسیاست کرنے کی بجائے اپنے باپ سے ان سوالوں کے درست جوابات حاصل کرنے چاہئیں۔
