اسلام آباد (آن لائن) عوامی مسلم لیگ کے سربراہ شیخ رشید احمد نے کہا ہے کہ ن لیگ کی تحریک شہباز شریف کے خلاف ہوگی، شریف خاندان ایک مخصوص ایجنڈے پر عمل پیرا ہے،

دھرنے والوں کو فوج سے لڑانے کی سازش تھی ،نواز شریف نے کلبھوشن یادیو کا کیس کمزور کیا۔ موجودہ حکومت نے 4 سال میں 35 ارب ڈالرز قرضہ لیا۔ مسلم لیگ ن نے علمائے کرام کو بدنام کرنے کی کوشش کی۔ عوام ہر چیز پر 83 فی صد ٹیکس دیتے ہیں۔ ان خیالات کا اظہار عوامی مسلم لیگ کے سربراہ شیخ رشید احمد نے نجی ٹی وی کو انٹرویو دیتے ہوئے کیا۔ انہوں نے کہا کہ افغان کرنسی آج پاکستان کے مقابلہ میں مہنگی ہوچکی ہے جو تول کربکتی تھی۔ ختم نبوت قانون میں ترمیم میں انوشہ رحمن بھی ملوث ہیں۔ نواز شریف نے کلبھوشن یادیو کا نام کبھی نہیں لیا۔ نواز شریف نے کلبھوشن کا کیس کمزور کیا۔ نواز شریف کو کلبھوشن کا کیس اسی طرح لڑنا چاہیے تھا جس طرح انہوں نے پاناما کیس لڑا۔ انہوں نے کہا کہ شریف برادران ایک مخصوص ایجنڈے پر کام کر رہے ہیں۔حقیقت یہ ہے کہ شریف برادران اور پاکستان ایک ساتھ نہیں چل سکتے، بھارت کو خوش کرنے کے لیے قانون توڑے گئے، ہر قانون توڑنے والے کو سزا ضرور ملے گی۔شیخ رشید احمد نے کہا کہ پاک فوج نے دہشت گردی کے خلاف جنگ لڑ کر تاریخ رقم کی۔