لاہور (مانیٹرنگ ڈیسک) پاکستان ٹیلی وژن کے چیئرمین عطا الحق قاسمی نے پی ٹی وی پشاور سینٹر میں آگ لگنے کے واقعہ پرتشویش کا اظہار کرتے ہوئے کہا ہے کہ آگ کی وجوہات کا تعین کیا جا رہا ہے تاہم ابتدائی اطلاعات کے مطابق شارٹ سرکٹ آگ لگنے کی وجہ بنا۔نقصانات کے تخمینے اور وجوہات کا سراغ لگانے کے لئے تحقیقاتی کمیٹی تشکیل دے
دی گئی ہے ۔ مکمل رپورٹ آنے تک غیر ضروری قیاس آرائیوں سے گریز کیا جائے۔ انہوں نے کہا کہ قومی ادارے ملک و قوم کا اثاثہ ہیں ان کی حفاظت ادارے سے وابستہ ہر فرد کی ذمہ داری ہے۔پی ٹی وی پشاور سینٹر میں پیش آنے والا افسوسناک واقعہ اگر کسی غفلت یا دانستہ کوشش کا نتیجہ ہوا تو ذمہ داران کے ساتھ کوئی رعایت نہیں برتی جائے گی۔
