اسلام آباد (مانیٹرنگ ڈیسک) غیر سرکاری تنظیم الف اعلان نے پاکستان ڈسٹرکٹ ایجوکیشن رپورٹ جاری کر دی ہے، تفصیلات کے مطابق پرائمری سکول کے انفراسٹرکچر میں خیبرپختون خوا کا پہلا نمبر ہے، اسلام آباد کا دوسرا، پنجاب کا تیسرا اور فاٹا کا آخری نمبر ہے، مڈل سکول انفراسٹرکچر میں پنجاب کا پہلا نمبر ہے، بلوچستان اور آزاد کشمیر مڈل سکول انفراسٹرکچر میں آخری نمبر پر ہیں۔ یہ سب غیر سرکاری تنظیم الف اعلان کی طرف سے پاکستان آل ڈسٹرکٹ ایجوکیشن رپورٹ 2017 میں بتایا گیا ہے، پنجاب کے صوبائی
وزیر تعلیم رانا مشہود نے کہا کہ بھٹے پر کام کرنے والے بچوں کو سکول میں لے کر آئے ہیں اور پنجاب میں 2018ء میں پانچ سے نو سال کا بچہ سکول سے باہر نہیں ہو گا، خیبرپختونخوا کے وزیر تعلیم عاطف خان نے کہا کہ پہلی دفعہ ہمارے صوبے میں سروے کیا ہے، اس کے بعد ہم بچوں کو سکول میں لانے کے لیے مزید کوششیں تیز کر سکتے ہیں، رپورٹ میں کہا گیا ہے کہ سکول نہ جانے والے بچوں میں کمی ہے لیکن پھر بھی سکول نہ جانے والے بچوں کی تعداد بہت زیادہ ہے ان بچوں کو بھی سکول میں ہونا چاہیے۔
