اسلام آباد/لاہور( این این آئی)فیڈرل بورڈ آف ریو نیو نے ٹیکس سال2016ء کے اعداد و شمارجاری کردئیے، رجسٹرڈ ٹیکس دہندگان کی تعداد صرف 12لاکھ 368ہے، 3لاکھ 67ہزار 520افراد نے کوئی ٹیکس ہی ادا نہیں کیا جبکہ مجموعی طورپر211ارب روپے کا ٹیکس جمع کیا گیا۔ایف بی آر کے مطابق ایک کروڑ روپے سے زیادہ انکم ٹیکس دینے والوں کی تعداد 2445تھی جو کل رجسٹرڈ ٹیکس دہندگان کا صرف 0.2فیصد ہیں۔

3471 ٹیکس دہندگان نے 100 روپے تک ٹیکس ادا کیا۔16 ہزار 607نے 100سے 500، 3لاکھ 75ہزار 207افراد نے 500سے 20 ہزار روپے تک انکم ٹیکس بھرا۔ 20 ہزار روپے سے لیکر ایک لاکھ روپے تک ٹیکس دینے والوں کی تعداد 2 لاکھ 33ہزار 95رہی۔دستاویزات کے مطابق ایک لاکھ سے 5لاکھ روپے تک ٹیکس دینے والے ایک لاکھ 39ہزار 781، 5لاکھ سے 10لاکھ روپے تک انکم ٹیکس ادا کرنے والے 28ہزار 841جبکہ 10لاکھ سے ایک کروڑ روپے تک ٹیکس دہندگان کی تعداد 33ہزار 401تھی۔