اسلام آباد(مانیٹرنگ ڈیسک)این اے 4کے الیکشن سےقبل جب حامد میر نے تحریک انصاف کے جیتنے کی پیشگوئی کی تو لاہور سے ن لیگ کی اہم شخصیات نے حامد میر کو فون کر کے ان کا ایسا مذاق اڑایا کہ انہیں اپنا فون ہی بند کرنا پڑا، اس بات کا انکشاف حامد میر نے نجی ٹی وی نائنٹی ٹو نیوز کے پروگرام میں میزبان محمد مالک کے ایک سوال کا جواب دیتے ہوئے کیا۔

حامد میر کا کہنا تھا کہ میں نے اپنے پروگرام میں این اے 4کے حوالے سے تحریک انصاف کے امیدوار ارباب عامر کے بیان کا ویڈیو کلپ چلایا جس میں وہ دعویٰ کر رہے تھے کہ تحریک انصاف 100فیصد این اے 4پشاور کے الیکشن سے کامیابی حاصل کرے گی اور ایک بڑے مارجن سے جیت اپنے نام کرینگے، اسی پروگرام میں میں نے ن لیگ اور اے این پی کے امیدواروں کے بھی بیان چلائے ۔ حامد میر کا کہنا تھا کہ تحریک انصاف کے امیدوار کی ویڈیو چلانے کے بعد مجھے لاہور سے ن لیگ کے اہم رہنمائوں کی فون کالز موصول ہونے لگ گئیں جس میں انہوں نے مجھ سے کہا کہ پشاور سے آپ دور بیٹھیں ہیں آپ کو زمینی حقائق کا نہیں پتہ،لیگی رہنمائوں نے مجھ سے پوچھا کہ آپ کے خیال میں کون جیتے گا تو میں نے انہیں کہا کہ میرے خیال میں اصل مقابلہ این اے 4میں پی ٹی آئی اور اے این پی کا مقابلہ ہےجس پرمجھے کہا گیا کہ انتخابات کے نتائج کے بعد آپ کی کریڈیبلٹی متاثر ہو سکتی ہےاور انہوں نے میرا مذاق اڑانا شروع کر دیا اور اتنا مذاق اڑایا کہ مجھے اپنا فون بند کرنا پڑا۔ حامد میر کا کہنا تھا کہ این اے 4کے انتخابات کے نتائج کے بعد جب تحریک انصاف کے امیدوار نے فتح حاصل کی تو میں نے انہی ن لیگی رہنمائوں کو فون کئے مگر وہ اب میرا فون ہی نہیں اٹھا رہے۔