کراچی (مانیٹرنگ ڈیسک) کراچی میں بارشوں کے ساتھ ساتھ سمندری طوفان کی اطلاعات نے شہریوں میں خوف ہراس پھیلا دیا تھا لیکن محکمہ موسمیات نے طوفان کی افواہوں کو مسترد کرتے ہوئے محض بارشوں کی پیش گوئی کردی۔کراچی میں وقفے وقفے سے ہونے والی

بارشوں سے شہر قائد میں جابجا پانی جمع ہوگیا، ناگن چورنگی سے پاور ہاؤس چورنگی تک 2 کلومیٹر علاقہ سیلاب کی تصویر بن گیا۔ شہر میں ایمرجنسی کے باوجود انتظامیہ غائب ہے، صورتحال کنٹرول سے باہر ہو رہی ہے۔ بارش اور پائپ لائن پھٹنے سے پانی اکٹھا ہوا مگر تاحال نکاسی کا کوئی انتظام نہیں  کیا گیا، سرجانی ٹاون آنے اور جانے والا رستہ ٹریفک کیلئے بند کر دیا گیا۔بارش کے باعث کئی گرڈ سٹیشنز ٹرپ کرنے سے مختلف علاقوں میں بجلی غائب ہوگئی، ملیر، کورنگی، ناظم آباد، نارتھ کراچی، سرجانی ٹاؤن، پی ای سی ایچ سوسائٹی، گرو مندر، ماڈل کالونی، گلشن اقبال، سہراب گوٹھ، گلبرگ میں بجلی کی سپلائی معطل ہے جس سے شہریوں کو پریشانی کاسامنا ہے۔دوسری جانب کراچی میں بارش کے باعث مختلف حادثات میں 9 افراد جاں بحق ہو گئے، بلدیہ 24 مارکیٹ، لیاری کلاکوٹ جڈگال چوک، انڈہ موڑ کے قریب کرنٹ لگنے سے ایک شہری اور دو بچے جاں بحق ہو گئے۔