ہری پور(آئی این پی)پاکستان مسلم لیگ(ن) کے رہنما کیپٹن (ر) صفدر نے کہا ہے کہ ایک دوسرے کی ٹانگیں کھینچنے سے پاکستان آگے نہیں پیچھے جائے گا ، ہزارہ کے عوام نے یہودیوں کا ایجنڈا مسترد کردیا ہے ، ماضی میں بھی نوازشریف کے خلاف بے بنیاد مقدمات بنائے گئے ،

جے آئی ٹی کو سوالوں کا علم نہیں تھا ، ان کے پاس رپورٹ تیار تھی ، وہ کون لوگ ہیں جو منتخب حکومتوں کو گھر بھیج دیتے ہیں ۔ پیر کو ہری پور میں مسلم لیگ (ن) کے جشن آزادی یوتھ کنونشن سے خطاب کرتے ہوئے کیپٹن (ر) صفدر نے کہا کہ ہمارے قائد محمد نوازشریف نے ملک کو ایٹمی قوت بنایا ، ماضی میں بھی نوازشریف کے خلاف بے بنیاد مقدمات بنائے گئے ، پاکستان بنانے کیلئے ہمارے آباؤ اجداد نے بہت قربانیاں دیں ، لیاقت علی خان کی شہادت کی تحقیقات کیلئے کمیشن کا مطالبہ کرتے ہیں ، ایک دوسرے کی ٹانگیں کھینچنے سے پاکستان آگے نہیں پیچھے جائے گا ۔انہوں نے کہا کہ ترقیاتی منصوبوں کی تکمیل کے لئے بہت سے ذاتی مفادات کو پس پشت ڈالنا پڑتا ہے ، ہزارہ کے عوام نے یہودیوں کا ایجنڈا مسترد کردیا ہے ، ترقیاتی منصوبوں کی تکمیل کے لئے ذاتی مفاد کی جگہ ملکی مفاد کو ترجیح دینا ہوگی ۔ انہوں نے کہا کہ ملک کی ترقی کے لئے ووٹ کے تقدس کو لازم قراردینا ہوگا ، محمد نوازشریف 22کروڑ عوام کے دلوں میں رہتے ہیں ، ماضی میں بھی نوازشریف کے خلاف بے بنیاد مقدمات بنائے گئے ۔ کیپٹن (ر) صفدر نے کہا کہ عوام نے عدالت کے فیصلے کو منظور نہیں کیا ، محمد نوازشریف کو عوام کے دلوں سے کوئی نہیں نکال سکتا ، جے آئی ٹی کو سوالوں کا علم نہیں تھا ان کے پاس رپورٹ تیار تھی ۔کیپٹن (ر) صفدر نے سوال کیا کہ وہ کون لوگ ہیں جو منتخب حکومتوں کو گھر بھیج دیتے ہیں ، اس ملک میں پارلیمنٹ کے فیصلے چلیں گے ، 2018میں ہری پور سے مخالفین کی ضمانتیں ضبط کرائیں گے ۔ (ن م)