اسلام آباد(آئی این پی ) تحریک انصاف کے چیرمین عمران خان نے کہا ہے کہ نوازشریف کو میرا پیغام ہے کہ وہ حقیقت سے منہ نہیں موڑ سکتے آپ کی گیم ختم ہوگئی اور آپ ہار گئے ہیں۔سماجی رابطے کی ویب سائٹ ٹویٹر پر اپنے پیغام میں تحریک انصاف کے چیرمین عمران خان نے کہا کہ نوازشریف کی قیادت میں نکلنے والی کرپشن بچا و ریلی پر نوازشریف کو میرا پیغام ہے کہ آپ ایمپائرز، موسم، پچ اور کھلاڑیوں کو تو ذمہ دار ٹھہرا سکتے ہیں

لیکن اس حقیقت سے منہ نہیں موڑ سکتے کہ آپ ہار گئے اور آپ کی گیم ختم ہوگئی۔عمران خان نے کہا کہ نوازشریف نے محسوس کیا ہوگا کہ آپ کی رہنمائی میں چلنے والے اور آپ کو سننے والے لوگوں کی تعداد میں خاطر خواہ کمی آگئی ہے۔ پاکستان تحریک انصاف کے رہنما شفقت محمود نے کہا ہے کہ تین بار وزیراعظم بننے والا اداروں کی تضحیک کر رہا ہے، نواز شریف کبھی بھی شہباز شریف کو آگے نہیں آنے دیں گے،(ن)لیگ کے پبلک سپورٹ کے دعوے سے ہوا نکل گئی ہے۔ جمعرات کو میڈیا سے گفتگو کرتے ہوئے شفقت محمود نے کہا کہ شہباز شریف کی اہلیہ کہتی ہیں کہ شہباز شریف کو مشکل میں کیوں ڈال دیا ، جہلم میں بھی اسٹیج پر صرف پولیس کھڑی ہے، مسلم لیگ (ن) کے پبلک سپورٹ کے وعدے سے دعوے سے ہوا نکل گئی ہے، قافلے کے استقبال کرنے کیلئے کوئی موجود نہیں ہے، اصل حقیقت کھل کر سامنے آ گئی ہے۔ انہوں نے کہا کہ سرکاری مشینری استعمال کی گئی، کاروبار اور دکانیں بند کرائی گئیں، مسلم لیگ(ن) کی ریلی میں عدلیہ مخالف پمفلٹ تقسیم کئے گئے، تین بار وزیراعظم بننے والا اداروں کی تضحیک کر رہا ہے، نواز شریف کبھی شہباز شریف کو آگے نہیں آنے دیں گے۔