کراچی(این این آئی)سندھ کے وزیربرائے صنعت و تجارت منظور حسین وسان نے موجودہ سیاسی صورتحال اورپانامہ کیس کی صورتحال کے متعلق پیشن گوئیاں کرتے ہوئے کہا ہے کہ ملک میں 24جولائی سے 15اگست کے درمیان اہم فیصلے ہوں گے، آئندہ عید مختلف ہوگی بڑی قربانیاں ہوں گی۔ان خیالات کا اظہار انہوں نے پیرکو سندھ اسمبلی میں میڈیا سے گفتگو کرتے ہوئے کیا۔

انہوں نے کہا کہ پہلے بڑی عیدوں پر چھوٹی قربانیاں ہوتی تھیں،اس عید قربان پر اب چھوٹی نہیں بڑی قربانیاں ہوں گی۔انہوں نے ایک سوال کے جواب میں کہا کہ اب آنٹیوں کا دور ختم ہوگیا، احتساب کو انکل نہیں بنارہے ہیں، جو لوگ سمجھتے ہیں کہ یہ معاملہ صرف نوازشریف تک محدود ہوگا وہ ان کی بھول ہے، جولائی کا مہینہ مشکلات کا ہوگا۔ یہ معاملہ اور لوگوں تک بھی جائے گا، اگر جمہوریت ڈی ریل ہوئی تو انتخابات ہوتے نظر نہیں آرہے، پاکستان میں جمہوری نظام ہی ترقی کرسکتا ہے۔ انہوں نے کہا کہ حالات اگر اس طرح رہے تو پھر انتخاب ہوتے ہوئے نظر نہیں آتے، نواز شریف کی تکلیف میں اضافے کااحساس ہے،یہ احتساب کا معاملہ صرف سیاستدانوں تک محدود نہیں رہے گا، بیورو کریٹس، ٹی وی مالکان اور اینکرز بھی اس کے زد میں آئیں گے۔ انہوں نے کہا کہ چوھدری نثار علی صاحب کی کمر کا درد کبھی بڑھ جائیگا تو کبھی کم ہوتا جائیگا ان کو کمر میں درد اس لئے ہیں کہ شہباز شریف وزیر اعظم بن جائے، جب ان کو پتاچلاکہ شہبازشریف وزیراعظم بن رہے ہیں تو کمر کا درد کم ہوگیا۔ انہوں نے کہا کہ موسم تو ٹھنڈا ہے پر سیاسی موسم گرم رہے گا، ملک میں سیاسی درجہ حرارت میں اضافہ ہوگا۔