اسلام آباد(آئی این پی )آل پاکستان مسلم لیگ کے چیف آرگنائزر سید فقیر حسین بخاری نے کہا ہے کہ میاں نواز شریف کو ڈٹے رہنے کا مشورہ دینے والے انہیں جیل بھیجوا کر دم لیں گے۔ غیردانشمند مشیروں کے مشورے پر عمل جاری رکھا گیا تو شریف خاندان اور مسلم لیگ ن مزید رسوا ہوں گے۔ جمعہ کو اپنے ایک بیان میں انہوں نے کہا کہ دانشمندی اسی میں ہے کہ جے آئی ٹی کی رپورٹ آنے کے بعد میاں نواز شریف وزارت عظمیٰ سے از خود مستعفی ہوجائیں۔
ایسا وزیراعظم جو بیرون ملک کسی کمپنی کا ملازم بھی ہو ،کسی نے آج تک دیکھا نہ سنا۔نواز شریف کے وزیراعظم ہوتے ہوئے بیرون ملک ورک ویزہ رکھنا اور کمپنی سے تنخواہ لینا شرمناک ہے۔انہیں اپنی سیٹ کا خیال بھی نہ آیا۔ماضی گواہ ہے کہ یہ لوگ صرف چڑھتے سورج کی پوجا کرتے ہیں،مشکل وقت آنے پر ساتھ چھوڑ دیتے ہیں۔ ۔دانشمندی کا تقاضا یہی ہے کہ وہ فوری طور پر اقتدار سے الگ ہوجائیں اور کسی اہل آدمی کو وزیراعظم بنائیں ۔
