مظفر آباد(مانیٹرنگ ڈیسک) برہان وانی کی پہلی برسی ، بھارت ہوش کھو بیٹھا، بھارتی جنونی فوجیوں کی آزادکشمیر کی شہری آبادی پر گولہ باری، 2شہری شہید، پانچ افراد زخمی۔ آئی ایس پی آر کے مطابق بھارتی فوج نے سیز فائر معاہدے کی خلاف ورزی کرتے ہوئے ایل او سی پر عباس پور سیکٹر کے مختلف علاقوں کو بھارتی ہتھیاروں سے نشانہ بنایا ، ان علاقوں میں چھاترہ، پولس، ستھوال اور دیگر دیہات شامل ہیں ۔ تتہ پانی کے منڈھول سیکٹر میں

بھارتی فوج کی گولہ باری سے دو شہری شہید ہو گئے ہیں جن میں سے ایک کی شناخت 75سالہ محمد شریف کے نام سے ہوئی ہے جسے کراسنگ پوائنٹ پر بے رحمانہ انداز میں نشانہ بناتے ہوئے شہید کیا گیا جبکہ دوسرے شخص کی شناخت نہ ہو سکی۔ دوسری جانب آزادکشمیر کے پونچھ ڈویژن کو نشانہ بنانے کے ساتھ بھارتی فوج نے کوٹلی کے نکیال سیکٹر میں بھی اشتعال انگیز فائرنگ کی ہے جس سے 22سالہ نوجوان لڑکی سمیت پانچ افراد زخمی ہو گئے ہیں۔