اسلام آباد(مانیٹرنگ ڈیسک)جے آئی ٹی نے مریم نواز کو فائدہ پہنچا دیا، تاریخی غلطی اگر درست نہ کی گئی تو ن لیگ جے آئی ٹی پر الزامات عائد کرتی رہے گی، پیپلزپارٹی کے سینئر رہنما اور سینیٹر بیرسٹر اعتزاز احسن کی نجی ٹی وی پروگرام میں گفتگو۔ تفصیلات کے مطابق
نجی ٹی وی پروگرام میں گفتگو کرتے ہوئے پیپلزپارٹی کے سینئر رہنما اور سینیٹر بیرسٹر اعتزاز احسن نے کہا ہے کہ جے آئی ٹی سے ایک تاریخی غلطی ہو گئی ہے جسے درست کیا جا سکتا ہے۔ انہوں نے کہا کہ جے آئی ٹی کو ان کیمرہ تحقیقات کے بجائے شریف خاندان کی عوامی سماعت کرنی چاہئے تھی۔اس طریقے سے وزیراعظم کے صاحبزادے حسین نواز جو بیان جے آئی ٹی کو دے کر آتے تو باہر بھی پتہ ہوتا کہ کیا دستاویزات جمع کرائی گئیں اور کیا بیان دیا گیا۔جبکہ اب ان کیمرہ سماعت کی گئی ہے اور میں پہلے دن سے کہہ رہا ہوں کہ یہ اوپن ٹرائل ہونا چاہئے کیونکہ جے آئی ٹی میں دئیے گئے بیانات اور کارروائی کو مسخ کئے جانے کا اندیشہ ہے اور یہ اس سے متعلق غلط بیانی کریں گے۔ واضح رہے کہ پروگرام کی خاتون اینکر نے اعتزاز احسن سے سوال پوچھتے ہوئے وزیر قانون پنجاب رانا ثنا کے اس بیان کا بھی حوالہ دیا تھا کہ جس میں رانا ثنا نے کہا تھا کہ جے آئی ٹی میں پیشی سے مریم نواز کا سیاسی حوالے سے جو کام دس سال میںہوناتھا وہ ابھی سے ہو گیا۔اینکر نے سوال پوچھا کہ کیا مریم نواز کی جے آئی ٹی میں پیشی سیاسی لانچنگ تھی اور وہ کس حد تک کامیاب رہی؟۔