اسلام آباد(مانیٹرنگ ڈیسک)وزیراعظم کے صاحبزادوں حسن اور حسین نواز کی پیشی کے موقع پر وزیراعظم کے معاون خصوصی آصف کرمانی کی میڈیا نمائندوں کے ساتھ گفتگو کے دوران ان کے پیچھے کھڑی اس شخصیت کا نام پیرسید علی رضا بخاری ہے جو آج کل آزادکشمیر اسمبلی میں مسلم لیگ ن کی جانب سے علما و مشائخ سیٹ پر منتخب ہوئےہیں۔ پیر سید علی رضا بخاری کا
تعلق آزادکشمیر کے علاقے ضلع حویلی کے گائوں بساہاں شریف سے ہے ۔ پیر علی رضا بخاری بساہاں شریف کی مشہور و معروف درگاہ کے گدی نشین ہیں اور آزادکشمیر اسمبلی میں علما و مشائخ کی مخصوص نشست پر مسلم لیگ کی طرف سے منتخب ہونے میں وزیراعظم پاکستان نواز شریف کے معاون خصوصی آصف کرمانی کی نظر خاص کے شکر گزار ہیں۔ مشرف دور میں متحدہ مجلس عمل کے ٹکٹ پر حویلی کی نشست پر انتخاب لڑنے والے پیر علی رضا بخاری پیپلزپارٹی کے ابتدائی دور میں پیپلزپارٹی میں شامل ہو ئے اور آصف زرداری کی قیادت پر اعتماد کا اظہار کیا بعد ازاں ایم ایل اے فیصل راٹھور اور پیپلزپارٹی کی قیادت سے اختلافات کے باعث پارٹی چھوڑ دی اور حویلی کی معروف سیاسی شخصیت اور سابق نگران وزیراعظم آزادکشمیر چوہدری محمد عزیز کے کیمپ میں شمولیت اختیار کی۔ بتایا جاتا ہے کہ آصف کرمانی اور پیر علی رضا بخاری کے درمیان خصوصی مراسم ہیں جبکہ آصف کرمانی وزیراعظم نواز شریف کے 1997کے دور میں ان کے پرسنل سیکرٹری رہ چکے ہیں اور اب معاون خصوصی کی حیثیت سے ذمہ داریاں ادا کر رہے ہیں اور جلد ہی انہیں سینیٹر کے طور پر سینٹ کے میدان میں مسلم لیگ ن کی جانب سے اتار دیا جائے گا۔ ذرائع کے مطابق آصف کرمانی پیر علی رضا بخاری کے مریدین میں بھی شامل ہیں
اور پیر صاحب کے بتائے ہوئے سعد اور نحس پر عمل کر کے آج ترقی کی منازل طے کر رہے ہیں جبکہ پیر علی رضا بخاری کو آزادکشمیر اسمبلی میں پہنچانے والے وزیراعظم کے معاون خصوصی آصف کرمانی ہی ہیں کیونکہ مخصوص نشستوں پر انتخاب کیلئے باقاعدہ طور پر اسلام آباد سے آزادکشمیر کی ن لیگ قیادت کو ہدایات جاری کی گئی تھیں اور اس حوالے سے آصف کرمانی کی سفارش پر پیر علی رضا بخاری آف بساہاں شریف کا نام علما و مشائخ سیٹ کیلئے فائنل ہوا تھا۔
