اسلام آباد (آن لائن) سابق وفاقی وزیر حامد سعید کاظمی نے افتخار چودھری کے بارے میں آصف زرداری کی بات پر کہا ہاتھیوں کی لڑائی میں چیونٹی کا کیا کام۔ ایک انٹرویو کے دوران جب سابق صدر کے افتخار چودھری سے متعلق ریمارکس پر سوال کیا گیا تو انہوں نے کہا آصف زرداری سابق صدر اور وہ سابق چیف جسٹس ہیں دونوں کے عہدے بڑے تھے وہ بڑے لوگ ہیں ہاتھیوں کی لڑائی میں ہمارا کیا کام ہے۔ انہوں نے کہا انہیں قانون
کی عدالت سے انصاف مل گیا اب عوام کی عدالت سے انصاف چاہتے ہیں۔ ان پر الزامات من گھڑت کہانیاں تھیں‘ سوموٹو کرپشن پر نہیں حاجیوں کی مشکلات پر لیا گیا تھا جو سعودی عرب میں منیٰ اور عرفات کے درمیان پہلی بار ٹرین کی وجہ سے پیش آئی تھیں اور حاجیوں کو میرے شکایت کرنے پر اس کا معاوضہ بھی مل گیا تھا۔ جیل میں سی کلاس میں رکھا گیا۔ عزت کی بحالی کے لئے قانونی کارروائی کروں گا۔
