اسلام آباد(مانیٹرنگ ڈیسک)جعلی ڈگری کا الزام ثابت ،ن لیگی ایم پی اے ضیاءالرحمان نااہل قرار۔نجی ٹی وی کے مطابق پشاور ہائیکورٹ نے جعلی ڈگری کیس میں ن لیگ کے ایم پی اے میاں ضیاءالرحمان کیخلاف نااہلی کا حکم جاری کر دیا ۔رکن خیبر پختونخوا اسمبلی ضیاءالرحمان حلقہ پی کے54 مانسہر ہ 2 سے منتخب ہوئے تھے۔یاد رہے کہ اس سے قبل جعلی ڈگری کیس میں مظفر گڑھ سیشن کورٹ جمشید دستی کونا اہل قرار دیتے ہوئے 3سال کی سزااور پانچ ہزار روپے جرمانہ کی سزا دے چکی ہے ۔
واضح رہے کہ جمشید دستی 2008 میں این اے 178 سے رکن قومی اسمبلی منتخب ہوئے تاہم سپریم کورٹ نے انہیں بی اے کی جعلی ڈگری رکھنے کے باعث نااہل قرار دے دیا تھا لیکن مئی 2010 کے ضمنی انتخابات میں وہ ایک بار پھر اسی حلقے سے دوبارہ رکن قومی اسمبلی منتخب ہوگئے تھے۔ جبکہ منڈی بہاؤالدین کے حلقہ این اے 108 سے 2 مرتبہ ایم این اے منتخب ہونے والے اعجاز چوہدری کو بھی عدالت جعلی ڈگری کیس میں 3 سال قید اور 20 ہزار روپے جرمانے کی سزا سناچکی ہے۔
