لاہور( این این آئی)عوامی مسلم لیگ کے سربراہ شیخ رشید احمد نے کہا ہے کہ پھٹیچر جیسے الفاظ ماضی ہیں، عمران خان کو لفظوں پر کمال حاصل نہیں ، پارلیمنٹ میں جو کچھ ہوا وہ کسی طرح بھی قابل تعریف نہیں۔ ایک انٹر ویو میںانہوںنے کہا کہ عمران خان نے جو الفاظ ادا کئے ہیں اس پر ان کی پارٹی کا موقف سامنے آ گیا ہے میں اس پر کچھ نہیںکہہ سکتا ۔ انہوں نے مراد سعید اور جاوید لطیف کے درمیان پارلیمنٹ میں جھگڑے اور گالم گلوچ پر
سوال کے جواب میں کہا کہ میں تو یہ کہتا ہوں کہ سیاستدانوں کو اپنے گندے کپڑے سب کے سامنے نہیں دھونے چاہئیں ۔ پوری قوم نہیں بلکہ پوری دنیا نے دیکھا ہے اور اسے کسی طرح بھی قابل تعریف نہیں کہا جا سکتا۔ انہوں نے ایک اور سوال کے جواب میں کہا کہ پانامہ کیس کے فیصلے سے تاریخ لکھی جائے گی اور پوری قوم کی نظر یں سپریم کورٹ پر لگی ہوئی ہیں۔ انہوں نے مزید کہا کہ میرا مطالبہ ہے کہ رینجرز کو پنجاب میں بھی سندھ کی طرح اختیارات دئیے جائیں ورنہ سندھ کو واپس آجانا چاہیے ۔ اگررینجرز نے پولیس کو بتا کر ہی کارروائی کرنی ہے تو ان کے پہنچنے سے پہلے ہی جرائم پیشہ عناصر کو اطلاع پہنچ جاتی ہے ۔
