اسلام آباد(مانیٹرنگ ڈیسک، نیوز ایجنسیاں)پی ایس ایل فائنل کیلئے پاکستان آنے والے غیر ملکی کھلاڑیوں بارے عمران خان کے بیان پر سیاسی رہنمائوں کا شدید ردعمل ،عمران خان کے بیان کو بغض ،حسد اور نسل پرستانہ قرار دے دیا۔ تفصیلات کے مطابق وزیر مملکت برائے اطلاعات و نشریات مریم اورنگزیب نے تحریک انصاف کے چیئرمین عمران خان کے بیان پر رد عمل دیتے ہوئے کہا کہ عمران خان نے جو گھٹیا الفاظ غیر ملکی
کھلاڑیوںکیلئے استعمال کئے ہیں ان سے پوری قوم کوان کی سوچ کا اندازہ ہو گیا ہوگا ۔ آزادی اظہار رائے ہر انسان کا بنیادی حق ہے لیکن عمران خان کے بیان سے غیر ملکی کھلاڑیوں کی دل آزاری ہوئی ہے ان کےبیان سے کسی طبقے کی دل آزاری افسوس ناک ہے ۔انہوں نے کہاکہ جو لیڈر ایسی زبان استعمال کرتا ہے تو 2018ءکے الیکشن میں لوگوں کو فیصلہ کرلینا چاہیے کہ کیا وہ ایسے لوگوں کو ووٹ دے کر قومی و صوبائی اسمبلیوں میں لے کر آئیں گے جو کہ ملکی مفاد کو بالائے طاق رکھتے ہیں ۔انہوں نے کہا کہ لاہور میں پی ایس ایل کے فائنل کے انعقاد پر پوری قوم مبارکباد کی مستحق ہے ، اصل میں فائنل دہشت گردوں کو پرامن پاکستان کا جواب تھا ۔غیر ملکی کھلاڑیوں بارے عمران خان کے بیان پر صوبائی وزیر قانون پنجاب رانا ثنا اللہ کا کہنا تھا کہ پاکستان تحریک انصاف کے چیئرمین عمران خان سےاپنا چھوٹا پن اور حسد چھپا ئے نہیں چھپ پا رہے ۔ انہیں پی ایس ایل کی کامیابی میں حصہ ڈالنا چاہیے تھا ۔ عمران خان کی گفتگو سے کسی کو نہیں خود عمران خان کو نقصان پہنچے گاجبکہ ایم کیوایم پاکستان کے رہنما فیصل سبزواری نے بھی غیر ملکی کھلاڑیوںبارے کپتان کے بیان پر مذمت کرتے ہوئے ان کے بیان کو نسل پرستانہ قرار دیاہے۔فیصل سبزواری کا کہنا تھا کہ عمران خان کا بیان پاکستان مخالفین جیسا ہے ۔ پاکستان میں بین الاقوامی کرکٹ براہ راست دہشت گردوں کو
کڑاجواب ہےجبکہ دوسری جانب وزیراعظم پاکستان میاں محمد نواز شریف کی صاحبزادی مریم نوازکا سماجی رابطوں کی ویب سائٹ ٹویٹر پر ایک ٹویٹ بھی سامنے آیا ہے جس میں ان کا کہنا ہے کہ” نوازشریف کے بغض میں پاکستان کو کمزور کرنے والے پیچھے رہ گئے ، پاکستان آگے نکل گیا۔
