کراچی (این این آئی) قوم کی اصلاح علماء کا کام ہے، غیر عالم اسلامی احکامات میں دخل اندازی سے گریز کریں، سندھ اسمبلی میں منظورکردہ اقلیتی بل غیر اسلامی وغیر آئینی ہے،کسی سے کوئی محاذ آرائی نہیں،ناموس رسالت اور شعائراسلامی کا تحفظ مقدم ہے، کوئی بھی قانون بنانے سے پہلے علماء کرام سے مشورہ لیاجائے۔ یہ باتیں جامعہ مجددیہ نعیمیہ گلشن نعیمی ملیر کراچی میں شہید مفتی غلام محمدنعیمی ؒ کے عرس مبارک کے اجتماع سے خطاب کرتے ہوئے مفتی منیب الرحمان، مہتمم جامعہ مفتی محمدجان نعیمی، پیر آغافضل الرحمان مجددی، صاحبزادہ ریحان امجد علی نعمانی، شیخ الحدیث مفتی قاضی محمداحمدنعیمی، صاحبزادہ مفتی نذیرا حمدجان نعیمی، مفتی تاج الدین نعیمی، علامہ غلام یاسین گولڑوی، علامہ غلام مصطفےٰ نعیمی ودیگر نے کہیں۔مقررین نے کہاکہ دین اسلام اقلیتوں کوبھی بہترحقوق فراہم کرتاہے ،انسانی حقوق کی نام نہادتنظیمیں اقلیتو ں کے حقوق کا ڈھنڈورہ پیٹنابندکردیں،کیونکہ پاکستان میں اقلیتوں کوکوئی مسئلہ نہیں ہے ۔
انہوں نے کہاکہ ناموس رسالت کے قانون پر اعتراض اور اس طرح کے دیگر معاملات کے ذریعے پاکستان کو سیکولراسٹیٹ بنانے کی سازش کی جارہی ہے جس کو ہرگزکامیاب نہیں ہونے دیاجائے گا،مدارس دینیہ اپنافریضہ انجام دیتے رہیں گے،قال اللہ اور قال الرسول اللہ ﷺ کی صدائیں بلند ہوتی رہیں گی۔مفتی منیب الرحمان نے اپنے خطاب میں کہاکہ دین کے کام کا میدان خالی چھوڑ کرقوم خوش گلوؤں پر فداہوگئی اور دین کا کام کسی اورنے لے لیا،علماء کی بے توقیری اور فنکاروں کی پذیرائی ہورہی ہے ۔انہوں نے مزیدکہاکہ مدارس میں زیرتعلیم بچوں کے والدین خوش نصیب ہیں جنہوں نے اپنی اولاد کو دین کا طالبعلم بنایایہ طلباء اپنی عملی زندگی میں جب تک دین کا کام کرتے رہیں گے ان کے والدین کو بھی ثواب ملتارہے گا،دین کی تعلیم سیکھنااور سکھاناپیشہ وروں پر نوٹ لٹانے سے کئی گنازیادہ بہتر عمل ہے۔اجتماع میں مفتی شفاعت رسول نعیمی،مفتی عثمان محمودنعیمی، علامہ عیسیٰ سومرونعیمی،علامہ فدااحمدنعیمی، مفتی گل حسن نعیمی، علامہ غلام محمدنعیمی لوڈو، پیراسماعیل جان سرہندی ودیگر نے بھی شرکت کی۔
