لاہور(این این آئی) چائلڈ پروٹیکشن اینڈ ویلفیئر بیورو پنجاب کی جانب سے سندھ اور خیبرپختونخوا کے گمشدہ و لا پتہ بچوں کوبازیاب کرانے کے بعدا ن کے والدین سے ملا نے کے موقع پر منعقدہ تقریب کے دوران رقت آمیز اور جذباتی مناظر دیکھنے میں آئے۔ وزیر اعلی شہباز شریف بازیاب کرائے گئے بچوں کو خودلے کر ان کے ماں باپ کی نشستوں پر گئے اور ان سے ملایا۔ ماں باپ اپنے بچھڑے ہوئے جگر گوشوں کو دیکھ کر جذباتی ہو گئے اور فرط جذبات سے ان کی آنکھوں سے خوشی کے آنسو جھلک پڑے۔
اس موقع پر وزیر اعلی شہباز شریف کی آنکھوں میں بھی بچوں اور والدین کی محبت دیکھ کر خوشی کے آنسو آگئے۔ماں باپ اپنے جگر گوشوں کو گلے سے لگا کر پیار کرتے رہے اور بچے بھی بچھڑے والدین سے ملکر خوشی سے روپڑے۔ گمشدہ اور لا پتہ بچے جنہیں بازیاب کراکر ان کے والدین سے ملایا گیا ہے ان کا تعلق صوبہ سندھ اور خیبرپختونخوا سے ہے جبکہ ایک بچے کا تعلق افغانستان سے ہے اور اس کے والدین کو افغانستان میں ٹریس کر لیا گیا ہے تا ہم اس بچے کو دیگر ضروری کارروائی مکمل ہونے کے بعد والدین کے حوالے کر دیا جائے گا ۔
