پشاور(این این آئی)وزیر اعلیٰ خیبر پختونخوا پرویز خٹک نے بس ریپڈ ٹرانزٹ پشاور منصوبے کی تعمیر کے دوران ٹریفک کے لئے متبادل ٹریفک پلان میں شامل سڑکوں کی تعمیر و توسیع کا کام جلد مکمل کرنے کی ہدایت کی ہے تاکہ منصوبے کو احسن انداز میں عملی جامہ پہنایا جائے۔ انہوں نے منصوبے کی تعمیر کے لئے اگلے مارچ تک ٹینڈر دینے کی ہدایت کی تاکہ منصوبے کی تعمیر مقررہ وقت کے اندر مکمل ہو سکے۔ وہ وزیر اعلیٰ سیکرٹریٹ پشاور میں بس ریپڈ ٹرانزٹ سکیم سے متعلق اجلاس کی صدارت کر رہے تھے۔ صوبائی وزیر محمد عاطف خان، معاون خصوصی ملک شاہ محمد وزیر، چیف سیکرٹری عابد سعید، متعلقہ محکموں کے انتظامی سیکرٹریوں اور اعلیٰ حکام نے اجلاس میں شرکت کی۔
اجلاس کو منصوبے کی تعمیر کے سلسلے میں تیاریوں پر پیش رفت سے آگاہ کیا گیا۔ اجلاس کو بتایا گیا کہ متبادل ٹریفک پلان کو جنوبی اور شمالی دو زونز میں تقسیم کیا گیا ہے۔ ہر زون اے اور بی دو روٹس پر مشتمل ہے۔ اجلاس کو مزید بتایا گیا کہ تین کنسلٹنٹس میں سے دو کے ساتھ ڈرافٹ ایگریمنٹ پر دستخط ہو چکے ہیں۔ وزیر اعلیٰ نے ہدایت کی کہ منصوبے کی تعمیر کا کام بروقت مکمل کرنے کے لئے تمام متعلقہ محکمے سنجیدہ کوششیں کریں۔ مارچ 2018تکمنصوبے کی تعمیر ہر صورت میں مکمل ہونی چاہئے۔ وزیر اعلیٰ نے کہا کہ منصوبے کے تعمیری کام کے دوران پشاور میں ٹریفک کا منظم /متبادل بندوبست ناگزیر ہے۔ اس مقصد کے لئے پہلے سے منظور شدہ متبادل ٹریفک پلان کے تحت مجوزہ سڑکوں کی تعمیر و توسیع کا کاممکمل ہونا چاہئے۔
وزیر اعلیٰ نے متبادل ٹریفک پلان کے جنوبی زون اے کے تحت یونیورسٹی روڈ کو ترجیحی بنیادوں پر ڈبل کرنے کی ہدایت کی۔وزیر اعلیٰ نے کنسلٹنٹس کے ساتھ حتمی معاہدوں پر جلد دستخط کرنیکا حکم دیا۔ وزیر اعلیٰ نے کہا کہ منصوبے کی بروقت تعمیر کے لئے ضروری ہے کہ مارچ تک ٹینڈر ایوارڈ ہو جائیں۔ انہوں نے اس مقصد کے لئے متعلقہ حکام کے ساتھ میٹنگ منعقد کرنے کی ہدایت کی تاکہ ٹائم لائن کا تعین کیا جا سکے۔ وزیر اعلیٰ نے اس منصوبے کو نفع بخش بنانے کے لئے بزنس ماڈل تیار کرنے کا حکم دیا اور واضح کیا کہ حکومت اس منصوبے کے لئے کوئی سبسڈی نہیں دے گی۔ ہم عوام کو آرام دہ اور سستی سفری سہولت دینا چاہتے ہیں۔
