اسلام آباد/لاہور(آئی این پی) نیشنل الیکٹر ک پاور ریگولیٹری اتھارٹی (نیپرا)نے بجلی کی قیمتوں میں کمی کا اعلان کر دیا ۔نیپرا نے بجلی کی قیمتوں میں 2روپے 60پیسے فی یونٹ کمی کر دی ہے جس کا نوٹیفکیشن بھی جاری کر دیا گیا ہے بجلی کی قیمتوں میں کمی اکتوبر کے بلوں میں فیول ایڈجسٹمنٹ کی مد میں کی گئی ہے ۔نیپرا ذرائع کا کہنا ہے کہ اکتوبر میں بجلی کی پیداواری لاگت 4روپے 72پیسے رہی تاہم اکتوبر میں صارفین سے 7روپے 33پیسے فی یونٹ وصول کیا گیا ۔ بجلی کی قیمتوں میں کمی کا ا طلاق 300سے کم اور یونٹ استعمال کرنے والے صارفین پر نہیں ہو گا ۔نوٹیفکیشن میں بتایا گیا ہے کہ قیمتوں میں کمی کا اطلاع کے الیکٹر ک کے صارفین پر نہیں ہو گا ۔
دوسری جانب حکومت نے بجلی کی لوڈشیڈنگ کے خاتمے کا نیا اور دلچسپ فارمولا تیار کر لیا‘ بجلی کا بل تو عوام ہی دیں گے لیکن بجلی کا استعمال سرکاری کی مرضی کے مطابق ہو گا اور ایسا کرنے پر لوڈشیڈنگ سے نجات بھی ممکن ہو سکے گی۔ذرائع کے مطابق اسلام آباد، راولپنڈی، لاہور میں ایڈونس میٹرنگ انفراسٹرکچر کی تنصیب کا فیصلہ کر لیا گیا ہے اور پہلے فیز میں 10 لاکھ 41 ہزار اے ایم آئی میٹر اورخصوصی ڈیوائسز لگائی جائیں گی۔ ان اے ایم آئی میٹرز کا کنٹرول آئیسکو کے پاس ہو گا اور بجلی کم ہونے کی صورت میں ڈیوائس پر زیادہ بجلی والے آلات بند کرنے کا میسج بھیجا جائے گا۔ذرائع کے مطابق اب بل نہ دینے والوں کا میٹر نہیں اترے گا بلکہ بجلی کی سپلائی بند ہو گی جبکہ فارمولے پر عمل کرنے والوں کو ٹیرف میں 10 پیسے فی یونٹ کمی کا بھی فائدہ ملے گا ۔ذرائع کا کہنا ہے کہ یہ منصوبہ 3 سال میں 17 ارب ڈالر کی لاگت سے مکمل کیا جائے گا اور اس منصوبے کیلئے فنڈز اے ڈی بی پروگرام دے گا