مدینہ منورہ(آن لائن) وفاقی وزیر مذہبی امور و بین لامذاہب ہم آہنگی سردار محمد یوسف نے کہا ہے کہ پاکستان کے عوام ، سیاسی اور عسکری قیادت حرمین شریفین کے دفاع کیلئے سعودی عرب کی پشت پر ہے۔ میاں محمد نواز شریف کی سربراہی میں پوری پاکستانی قوم ہر قربانی کیلئے تیار ہے۔ ان خیالات کا اظہار انہو ں نے مدینہ یونیورسٹی میں ایک انٹرنیشنل کانفرنس سے خطاب کرتے ہوئے کیا۔ کانفرنس میں گورنر مدینہ پرنس فیصل بن سلیمان، پرنس نواف بن نائف، مشیر وزیر داخلہ، اما م الحرم اور شاہ سلمان کے مشیر شیخ صالح بن حمید حرمین شریفین کے رئیس امام شیخ عبد الرحمن السیدیس ، مدینہ یونیورسٹی کے وائس چانسلر حاتم مرذوتی سمیت 30ملکوں کے وزراء علما اور نمائندگان شریک تھے۔
یہ کانفرنس جائزہ ،امیر نائف بن عبد العزیزکے زیر اہتمام منعقد کی گئی جس کا موضوع ’’سوشل میڈیا کے لئے اسلام کے قوائد و ضوابط ‘‘ تھا۔ وفاقی وزیر مذہبی امور سردار محمد یوسف نے کانفرنس کی افتتاحی تقریب میں عالم اسلام کے تمام شرکاء کی طرف سے نمائندگی کرتے ہوئے کہا کہ مسجدِ نبوی ﷺ کے قرب میں منعقد اس کانفرنس میں ہم پوری ذمہ داری سے اعلان کرتے ہیں کہ حوثیوں کی طرف سے خانہ کعبہ پر حملہ کی کوشش انتہائی قابلِ مذمت ہے۔ ایسا کرنے والے کسی طور پر بھی مسلمان نہیں ہو سکتے ۔ انہوں نے کہا کہ خادم الحرمین شریفین کی سربراہی میں سعودی حکومت کی طرف سے حرم کی تاریخی توسیعی قابلِ تعریف ہے اور یہاں حجاج و معتمرین کے لئے ہر طرح کی سہولیات فراہم کی گئی ہیں جس پر سعودی حکومت کو خراج تحسین کی مستحق ہے۔
وفاقی وزیر مذہبی امور نے کہا کہ جائزہ امیر نائف کی طرف سے نہایت اہم موضوع پرکانفرنس منعقد کی گئی ہے اور سوشل میڈیا کا کردار موجودہ دور میں نہایت اہمیت اختیار کر گیا ہے۔ سوشل میڈیا کا تعمیری اور تعلیمی استعمال صحیح تربیت کے ذریعے ممکن ہے۔ مدینہ کانفرنس کے ذریعے سوشل میڈیا کے استعمال میں نفع نقصان الگ کرنے اور اس سے فوائد حاصل کرنے میں مدد دے گی۔ سردار محمد یوسف نے کہا کہ سعودی عرب کا عالم اسلام کیلئے اہم ترین کردار ہے۔
شاہ سلمان بن عبد العزیز ولی عہد امیر محمد بن نائف بن عبد العزیز، نائب ولی عہد محمد بن سلمان کی قیادت میں سعودی عرب عالم اسلام کے امن و استحکام کیلئے اپنا بھرپور کردار ادا کر رہا ہے۔ پاکستان کے عوام اور تمام سیاسی و مذہبی جماعتیں اور علماء حرمین شریفین کے دفاع کیلئے خادم الحرمین شریفین کے ساتھ ہیں۔