اسلام آباد(مانیٹرنگ ڈیسک) بھارتی ہائی کمیشن کے انٹیلی جنس اداروں کے لئے کام کرنے والے اہل کاروں کا اتوار کو بھارت واپسی کا فیصلہ کر لیا گیا ۔تفصیلات کے مطابق بھارتی سفارتی اہل کار اتوار کے روز بھارت واپس روانہ ہوں گے، اور ان اہل کاروں کی واپسی براستہ سڑک واہگہ سے متوقع ہے۔ واپس روانہ ہونے والے بھارتی ہائی کمیشن کے اہل کاروں میں آٹھ سفارتی اہلکار شامل ہیں۔بھارت واپس جانے والے بھارتی ہائی کمیشن کے اہل کاروں میں کمرشل قونصلر راجیش کمار اگنی ہوتری، بلبئیر سنگھ، انوراگ سنگھ، امردیپ سنگھ بھٹی،جیا بالن سینتھل، مادھون ننداکمار، وجے کمار اور دھرمیندرا شامل ہیں۔واضح رہے کہ دفتر خارجہ کے مطابق بھارتی ہائی کمیشن کے کمرشل قونصلرراجیش کمار اگنی ہوتری ‘را’ کے پاکستان میں اسٹیشن چیف تھے،جبکہ بھارتی ہائی کمیشن کے فرسٹ سیکریٹری پریس اینڈ کلچر بلبیئر سنگھ کا تعلق بھارتی انٹیلی جنس بیورو سے ہے۔ جیا بالن سینتھل، اور سرجیت سنھگ کا تعلق بھی بھارتی انٹیلی جنس پیورو سے ہے، اور انوراگ سنگھ، امردیپ سنگھ بھٹی، مادھون نندا کمار، وجے کمار اور دھرمیندرا کا تعلق بھارتی خفیہ ایجنسی ‘را’ سے ہے۔

موضوعات:بھارتی ہائی کمیشن