اسلام آباد(مانیٹرنگ ڈیسک)حکومت نے دو نومبر کو پی ٹی آئی کے اسلام آباد بند کرنے کو ناکام بنانے کے لئے مختلف پلان ترتیب دینا شروع کر دئیے، دھرنے سے قبل عمران خان، شیخ رشید ،جہانگیر ترین ،شاہ محمود قریشی سمیت دیگر اہم رہنماوں کونظربند کرنے کے فیصلے پر غور۔نجی ٹی وی نے سرکاری ذرائع کے حوالے سے دعویٰ کیا ہے کہ پاکستان تحریک انصاف کے دھرنے سے قبل ہی پکڑ دھکڑ کا سلسلہ شروع کردیاجائے گا، جبکہ عمران خان شاہ محمود قریشی جہانگیر ترین اورشیخ رشید احمد سمیت کئی مرکزی رہنماو ں کو گرفتار کرنے پر غور کیا جا رہا ہے۔ ذرائع کے مطابق سیاسی رہنماوں کی نظر بندیوں کیلئے سرکاری ریسٹ ہاوسز، جبکہ کارکنوں کیلئے اڈیالہ جیل کی بیرکس خالی کرالی گئیں ہیں ۔
۔دوسری جانب اسلام آباد انتظامیہ نے ممکنہ دھرنے کے پیش نظر فورسز کیلیے عمارتیں خالی کروانے کے لئے مختلف محکموں کوخطوط لکھ دئیے ہیں، جن میں کہا گیا ہے کہ سرکاری عمارتیں 23 اکتوبر تک ضلعی انتظامیہ اسلام آباد کے حوالے کردی جائیں، جبکہ آبپارہ کمیونٹی سنٹرمیں 23 اکتوبرکے بعد شادیوں کی تقریبات کے لئے بکنگ بھی منسوخ کرنے کا حکم دے دیا ہے۔