اسلام آباد(مانیٹرنگ ڈیسک)پاکستان کے انٹیلی جنس ادارے آئی بی نے کہاہےکہ بھارت اور افغانستان پر سی پیک منصوبے کو نقصان پہنچانےکی کوشش کررہے ہیں۔پاکستان کے انٹیلی جنس بیورو آئی بی کے سربراہ آفتاف سلطان نے سینٹ کی کابینہ کمیٹی میں بیان دیتے ہوئے کہا ہے کہ ہندوستان اور افغانستان کی انٹیلی جینس ایجنسیاں اور لشکرجھنگوی اور طالبان گروہ، پاک چین مشترکہ اقتصادی راہداری منصوبے کو سبوتاژ کرنے کے لیے سرگرم ہوگئے ہیں۔سینیٹ کی کابینہ کمیٹی کے چیئرمین سینیٹر طلحہ محمود نے اس موقع پرکہا کہ سی پیک منصوبہ پاکستان کے لیے انتہائی اہمیت کا حامل ہے۔انہوں نے ملکی انٹیلی جنس اور سیکیورٹی اداروں کو ہدایت کی ہے کہ وہ بھارتی انٹیلی جینس سمیت تمام بیرونی عناصر کی سازشوں کو ناکام بنانے کے لیے اپنی پوری توانائیاں بروئے کار لائیں۔یہ پہلی بار نہیں جب پاکستان نے بھارت کے انٹیلی جنس اداروں پر سی پیک منصوبے کو نقصان پہنچانے کا الزام عائد کیا ہے۔