کوئٹہ (این این آئی) وزیراعلیٰ بلوچستان نواب ثناء اللہ زہری نے کہا ہے کہ چند ٹکوں کی خاطر بھارت کی غلامی کرنیوالوں کو بلوچستان کی تقدیر کا فیصلہ کرنے کا حق حاصل نہیں ہے،براہمداغ بتائے کس حیثیت سے بلوچستان کی بات کرتا ہے؟، وطن سے غداری کرنیوالے ہم میں سے نہیں۔کوئٹہ کے بگٹی کرکٹ اسٹیڈیم میں آل پاکستان بلوچستان ٹی ٹونٹی کپ کرکٹ ٹورنامنٹ کی افتتاحی تقریب سے خطاب کرتے ہوئے وزیراعلیٰ بلوچستان نے کہا کہ وطن سے غداری کرنے والے ہم میں سے نہیں ، ڈیرہ بگٹی کے عوام نے براہمداغ کی منفی ذہنیت مسترد کردی۔نواب ثنا ء اللہ زہری نے کہا کہ بھارت کیخلاف پورے بلوچستان میں لوگ باہر نکلے جو براہمداغ کی آنکھیں کھولنے کیلئے کافی ہے۔انہوں نے بھارتی وزیراعظم نریندر مودی کو خبردارکیاکہ اگر انہوں نے جارحیت کی کوشش کی تو دندان شکن جواب دیں گے۔تقریب میں کمانڈرسدرن کمانڈ لیفٹیننٹ جنرل عامر ریاض ، آئی جی ایف سی میجر جنرل شیر افگن ،صوبائی وزرا، اراکین اسمبلی سمیت سول وفوجی حکام نے شرکت کی۔ٹورنامنٹ میں شریک ٹیمیں نے بینڈ کی دھن پر مارچ پاسٹ کیا، اس موقع پر بلوچستان کی وومن کرکٹ ٹیم کی کھلاڑی موجود تھیں، ملک کے مختلف علاقوں اوربلوچستان کے فنکاروں نے علاقائی موسیقی کا شاندارمظاہرہ پیش کیا،اس موقع پر آتش بازی کا بھی شاندار مظاہرہ کیاگیا۔