گوجرانوالہ ( این این آئی) تحریک انصاف کے رائیونڈ کی طرف مارچ کو روکنے کے لئے مسلم لیگ (ن)کے یوتھ ونگ نے ڈنڈا بردار فورس تشکیل دے دی۔تفصیلات کے مطابق مسلم لیگ (ن)گوجرانوالہ کے ضلعی صدر شعیب بٹ نے تحریک انصاف کی جانب سے رائیونڈ کی جانب مارچ کو روکنے کے لئے ڈنڈا بردار فورس تشکیل دے دی ہے۔ ستر افراد پر مشتمل ڈنڈا بردار فورس کو باقاعدہ طور پر تربیت بھی فراہم کی جارہی ہے۔ اس حوالے سے مسلم لیگ (ن)کے مقامی رہنماؤں کا کہنا ہے کہ اگر کسی نے ہماری قیادت کے گھروں کی جانب جانے کی کوشش کی تو انہیں اس کی بھاری قیمت چکانی پڑے گی۔ اس موقع پر لیگی فورس نے ’’رائیونڈ جا ؤگے تو ڈنڈے کھا ؤگے ‘‘کے نعرے بھی لگائے۔واضح رہے کہ گزشتہ روز پاکستان تحریک انصاف کے چیئرمین عمران خان نے اعلان کیا تھا کہ رائیونڈ کی طرف ہر صورت مارچ ہو کر رہے گا اور وہ اتوار کو رائیونڈ مارچ کی تاریخ اور پلان کا اعلان کریں گے۔

موضوعات:بڑے تصادم کا خطرہ