لاہور ( این این آئی) شاہدرہ ٹائون میں بھابھی سے ناجائز تعلقات پر بھائیوں نے مل کر بھائی کو قتل کر دیا اور لاش کے ٹکڑے کر کے کھیتوں میں دفن کردیئے ، پولیس نے 4ملزمان کو گرفتار کر کے آلہ قتل بھی برآمد کر لیا ۔یہ بات ایس پی سٹی انوسٹی گیشن خالد عبد الرائوف نے اپنے دفتر میں پریس کانفرنس کے دوران میڈیا کے نمائندوں سے بات چیت کرتے ہوئے کی۔تفصیلات کے مطابق ایس پی سٹی انوسٹی گیشن خالد عبد الرائوف نے مقتول شہباز کے قاتلوں کو فوری طور پر گرفتار کرنے کے لئے قائم مقام ڈی ایس پی شاہدرہ سرکل اعجاز ڈھلو ،انچارج انوسٹی گیشن شاہدرہ ٹائون زکااللہ،انچارج ہومی سائیڈ سیل شاہدرہ سرکل عبدالطیف اور دیگر اہلکاروں پر مشتمل خصوصی پولیس ٹیم تشکیل دی اور قتل میں ملوث ملزمان کو گرفتار کرنے کا حکم دیا۔خصوصی پولیس ٹیم نے قتل میں ملوث ملزمان تک پہنچنے کے لئے مقتول کے بھائی شہزادکو مشکوک جان کر شامل تفتیش کیا جس نے دوران تفتیش پولیس کو بتایا کہ مقتول شہباز کے اپنی بھابی کے ساتھ ناجائز تعلقا ت تھے جس کو بہت سمجھایا لیکن وہ باز نہ آیا جس کی وجہ سے ہم چاروں بھائیوں نے اس کو چھریوں کے وار کر کے قتل کردیا اور اس کی نعش کے ٹکڑے کر کے نیو قیصر ٹائون کے علاقہ میں واقع کھیتوں میں دفن کردی ۔ پولیس نے ملزم کے باقی تینوں بھائیوں کو بھی گرفتار کر لیا اور ملزمان کی نشاندہی پر مقتول کی نعش جو کہ ٹکڑوں میں تقسیم تھی کھیتوں سے برآمد کر لی ۔پولیس نے ملزمان کے قبضہ سے آلہ قتل جس میں تیز دھار چھریاں شامل تھیں وہ بھی برآمد کر لیں ۔ملزمان میں تنویر ، اعجاز ،شہزاد اور سفقت شامل ہیںجو کہ مقتول کے حقیقی بھائی ہیں۔ملزمان کی گرفتاری پر ایس پی سٹی انوسٹی گیشن خالد عبدالرئوف نے پولیس ٹیم کو شاباش دی ۔