اسلام آباد (این این آئی)محکمہ موسمیات نے کہاہے کہ اگلے ہفتے سے ملک میں مون سون کی باقاعدہ بارشیں شروع ہو جائیں گی جس دوران پنجاب، اسلام آباد، خیبرپختونخوا، کشمیر، زیریں سندھ اور مشرقی بلوچستان میں اکثر علاقوں میں بارشیں ہو نگی ۔ترجمان عمران احمد صدیقی کے مطابق آئندہ 24گھنٹوں کے دوران ملک کے بیشتر علاقوں میں دن کے وقت موسم گرم اور خشک رہے گا تاہم میر پور خاص،سکھر، بہاولپور،کوئٹہ،قلات اور ڈی جی خان ڈویژن میں بعض مقامات پر تیز ہواؤں اور گرج چمک کے ساتھ بارش ہونے کا امکان ہے۔انہوں نے کہاکہ اگلے 2روز کے دوران ملک کے بیشتر علاقوں میں موسم گرم اور خشک رہے گاتاہم میر پور خاص،سکھر، بہاولپور،کوئٹہ، ڑوب، قلات، ڈی جی خان اور ملتان ڈویژن میں بعض مقامات پر تیز ہواؤں اور گرج چمک کے ساتھ بارش کی توقع ہے۔ اس کے علاوہ گزشتہ24گھنٹوں کے دوران ملک کے بیشتر علاقوں میں موسم گرم اور خشک رہا۔گزشتہ روز ریکارڈ کیے گئے گرم ترین مقامات کے درجہ حرارت: دادو46، تربت، بھکر، سبی 45، رحیم یار خان، اوکاڑہ، بہاولنگر،سکھر، جیکب آباد، شہید بینظیرآباد اور روہڑی میں44 ڈگری جبکہ آج لاہور میں کم سے کم 30، اسلام آباد اور پشاور26، کراچی 28،کوئٹہ 22، گلگت 16، چترال 19اور ہنزہ میں 13ڈگری سینٹی گریڈ رہنے کا امکان ہے۔